Delawie: Kosova në zgrip
Ambasadori i Shteteve të Bashkuara të Amerikës në Kosovë, Greg Delawie, thotë se Kosova është “në zgrip” për shkak të bllokadës politike që e ka kapluar vendin tash e gjashtë muaj.Në një deklaratë të dhënë për KALLXO.com, ai përshëndeti iniciativën e presidentes Atifete Jahjaga, për t’i takuar liderët politikë të vendit në një tavolinë, por tha se është i zhgënjyer nga fjalori i përdorur pas takimit.
“Përdorimi i fjalëve si ‘tradhti’ dhe ‘diktaturë’, për t’i karakterizuar vendimet që i marrin politikanët derisa janë duke e bërë punën e tyre, vërtetë e bëjnë dialogun më të rëndë dhe demokracinë më të vështirë”, tha ambasadori amerikan.
Duke e mbështetur iniciativën e Jahjagës në kërkim të gjetjes së një zgjidhjeje politike përmes dialogut, Delawie tha se pret nga liderët politikë “angazhime të mëtutjeshme”.
“Në këtë moment Kosova është në zgrip. Progresi është i mundshëm, por nuk është i sigurt”, tha ai. “Mendoj se është shumë e rëndësishme që bllokada politike të zgjidhet. Dua që Kuvendi të funksionojë”.
Ambasadori amerikan nuk pranoi të komentojë për çështjen e votimit të presidentit, pikë te e cila politika kosovare pritet të vijë brenda javëve.
“I përket Kuvendit të vendosë”, tha Delawie.