Deja vu” nga Kuvendi

Pamje të njëjta, sikur gjatë javëve të fundit, me shumë gjasë do të transmetohen edhe këtë javë nga Kuvendi i Kosovës.

Deputetët e opozitës përsëri kanë paralajmëruar bllokimin e seancës së Kuvendit, nëse ftohet për të enjten nga kryeparlamentari Kadri Veseli.

Ndërsa ky i fundit përsëri nuk e ka në plan ta urdhërojë futjen e sigurimit brenda sallës, sikurse as t’i largojë deputetët opozitarë, të cilët më shumë se një muaj po bllokojnë zhvillimin e punimeve të Kuvendit, përmes përdorimit të gazit lotsjellës.

Drejtuesit e partive opozitare thonë se nuk do të tërhiqen nga veprimet e tyre, madje edhe të përdorimit të gazit lotsjellës për aq kohë sa kryeministri Isa Mustafa nuk tërheq nënshkrimet nga marrëveshjet e arritura për Asociacionin e Komunave Serbe dhe demarkacionit të kufirit me Malin e Zi./zeri/