Degët me vjersha

Poezi nga Avdush Canaj

ti s`je dru, mollë
ti je pallat degësh
me njëqind ballkone
ku këndon vera

je pikturë luharesh
në maje gishtrinjësh
vjen era
kolovitë ëndrrat e gjetheve

nën hijën tënde
kur ma shtrinë dorën gjumi
zogu yt më mbulon me flatër
të mos ftohem

as kolla të mos më zë
hëna të do si unë
shpesh harron kapelën te ti
ti ia ruan mirë

s`ma jep as mua
degët i ke me vjersha
të ëmbëla
mollë e kopshtit