De Biasi tregon se a do të largohet nga Shqipëria

Trajneri i kombëtares së Shqipërisë, Gianni De Biasi është duke u kritikuar mjaftë shumë nga tifozët për katër humbjet radhazi, përcjell IndeksOnline.

Në një intervistë për “Panorama.al”, Biasi ka lënë të kuptohet se nuk e ka ndërmend të largohet, duke thënë se situatat e tilla i ka kaluar edhe më parë, dhe ka një pëlqim për to.

“Situata të tilla më bëjnë më të determinuar, më pëlqejnë më shumë momente të tilla. I kam kaluar këto momente kur kam qenë në Serinë A, me skuadra që ishin duke rënë nga kategoria dhe kemi shpëtuar. Dua t’ju them që kur shkuam në Europian ishin të gjithë të kënaqur, të gjithë protagonistë”, ka thënë Biasi.

Italiani ka thur lëvdata për yllin e Napolit, Elsid Hysaj i cili ishte startues në humbjen kundër Bosnja Hercegovinës.

“Është një nga futbollistët më të mirë që kemi, është një futbollist që dëshiron të luajë gjithnjë, të jetë në fushë. Nëse është për të pushuar, atëherë duhet të pushojë në vend tjetër, por ne nuk kemi shumë mundësi. Është një lojtar me kontribut dhe potencial të madh dhe e hodha në fushë, sepse është pjesë shumë e rëndësishme e këtij formacioni”, ka përfunduar trajneri italian.

Kombëtarja e Shqipërisë ndeshjen e radhës e luan kundër Izraelit në muajin qershor./IndeksOnline/