De Biasi: Largohem nëse s’kam objektiva të njëjta me FSHF-në

Viti 2016 ishte historik për skuadrën tonë përfaqësuese pasi dhuroi kualifikimin në një fazë finale të Evropianit për herë të parë që nga krijimi i federatës shqiptare të futbollit më 1930.

Në lidhje me këtë arritje, por edhe me të ardhmen e tij, trajneri i kuqezinjve Gianni de Biasi iu përgjigj në studion e “Ora Skaner” një paneli të përbërë nga personalitete që me sportin nuk i lidh profesioni , por pasioni. Tekniku italo-shqiptar deklaroi se shpreson që suksese të tilla të përsëriten duke theksuar se kjo kombëtare është e projektuar drejt një ardhmërie të shndritshme

“Shpresoj që në historinë e Shqipërisë të ketë momente të tjera të rëndësishme, por duhet të thënë se puna që është bërë vitet e fundit e dërgoi kombëtaren shqiptare në maja sepse mësimi më i mirë që mësuam është të besosh tek cilësia. Sot besoj se kombëtarja ka vazhdueshmëri, me një të ardhme.

De Biasi nuk mund të mos prekte çështjen e marrëdhënies me federatën shqiptare dhe kontratën që e lidh me Shqipërinë deri në fund të 2017-së, teksa shtoi se nëse një ditë nuk kanë objektiva të njëjtë me FSHF-në, atëherë rrugët do të ndahen.

“Nëse nesër apo pasnesër objektivat tona nuk janë të njëjta, atëherë unë do largohem dhe do shkoj në rrugën time”, tha trajneri i kombëtares shqiptare, i cili foli edhe në lidhje me dy talente që nuk luajnë për kuqezinjtë, në rastin e Dionis Avdijajt sepse nuk e zgjodhi Shqipëria, kurse në atë të Milot Rashicës ishte lojtari që vendosi të largohej drejt Kosovës.

“Bëra 800 km rrugë për ta parë. Pashë ndeshjen e Sturm Grazit dhe nuk pashë asgjë. Sot është më shumë i famshëm për klauzolën që Schalke 04 i vendosi se ajo që bën në fushën e lojës çdo javë. Rashica zgjodhi të luajë për Kosovën dhe kjo është një zgjedhje që e ka bërë me qetësi të plotë. Pavarësisht paraqitjeve që shoqëruan kualifikimin në Evropian, ku më së shumti zhgënjeu humbja me Izraelin, 2016-a do të mbetet gjithnjë viti i Shqipërisë”, tha italiani.