Davutoglu: Turqia do ta ndihmojë fuqizimin e Kosovës

Ministri i Punëve të Jashtme i Kosovës, Enver Hoxhaj ka zhvilluar sot një bisedë telefonike me ministrin e Punëve të Jashtme të Turqisë, Ahmet Davutoglu, ka njoftuar MPJ e Kosovës.

“Hoxhaj dhe Davutoglu kanë biseduar për marrëdhëniet bilaterale dhe anëtarësimin e Kosovës në organizata rajonale. Në këtë kontekst, kryediplomati kosovar ka vlerësuar se çështje kyçe për Ballkanin është bashkëpunimi rajonal. Lidhur me dialogun ndërmjet Kosovës e Serbisë, Hoxhaj ka thënë se kaptina e normalizimit të marrëdhënieve mund të shkruhet vetëm përmes implementimit të marrëveshjes së Brukselit” thuhet në njoftimin e MPJ’së.

Sipas MPJ’së, Hoxhaj gjatë bisedës e ka njoftuar homologun turk edhe për konsolidimin e shtetësisë së Kosovës dhe për forcimin e pozitës ndërkombëtare, përmes njohjes universale të saj. “Davutgolu, ndërkaq, ka vlerësuar lart progresin në Kosovë, si dhe ka rikonfirmuar mbështetjen e Turqisë për fuqizimin e gjithanshëm të shtetësisë dhe subjektivitetit ndërkombëtar të Kosovës”.

Davutoglu aktualisht ndodhet për vizitë zyrtare në Shqipëri, ku gjatë takimit me Ministrin e jashtëm Ditmir Bushati ka bërë të ditur se dy qeveritë, ajo e Turqisë dhe e Shqipërisë do të mbajnë mbledhje të përbashkëta.