Daut Haradinaj: Qeveria e ardhshme AAK-LDK, PDK në opozitë

Kemi thënë se s’bëjmë koalicion me PDK’në nëse Thaçi është Kryeministër. Ka ardhur koha që partia në pushtet të shkojë në opozitë për t’u pastruar. Zgjidhja më e mirë për Kosovën është një koalicion AAK-LDK. Blerim Shala po e kryen punën si duhet edhe në dialog, edhe në Aleancë. FARK’u i Bujar Bukoshit më shumë ka ekzistuar si bindje politike. Vrasjet e pasluftës duhet të zbardhen. Nëse AAK mendon se i sjell vota, atëherë kandidoj përsëri për deputet. Anëtari i Këshillit të Përgjithshëm të AAK’së, Daut Haradinaj flet për Express.

Express: Ku është AAK pak muaj para zgjedhjeve nacionale?

D. Haradinaj: Ajo që e kaluam në zgjedhjet lokale – edhe pas një humbje të pushtetit, nëse kisha mundur të them në komuna të rëndësishme siç është Peja dhe Gjakova – megjithatë Aleanca arriti ta ruajë numrin e votave dhe ta rrisë deri diku numrin e votave. Aktualisht, Aleanca është 105 mijë vota si subjekt politik, ndërsa kohëve të fundit është shtuar dinamika dhe janë bërë disa veprime konkrete, sidomos në disa Degë të caktuara, ku deri diku nuk kemi qenë mirë të konsoliduar. Shihet se është një interesim i madh i njerëzve në terren për me iu bashkua AAK’së. Por, gjithsesi ai vendimi final është se çfarë oferte do t’i bëjmë qytetarëve në zgjedhjet e ardhshme.

Express: A ka reflektuar AAK’ja pas humbjes së Pejës, Gjakovës, Rahovecit, Suharekës…?
D. Haradinaj: Gjithsesi, në çdo proces zgjedhor, përpos ndryshimeve që ndodhin në pushtet, edhe për një subjekt politik e sheh situatën ku e ka. Edhe në Aleancë është parë dhe kemi reflektuar. Po shihet edhe në veprimet e Aleancës, kohëve të fundit, janë në favor të asaj për të përmirësuar gjendjen. Ka ndryshime, ka interesime të njerëzve dhe tash po përgatitemi për zgjedhje nacionale.

Afërsia me Thaçin na ka kushtuar me vota

Express: Keni ndonjë analizë se pse i humbët këto komuna. Ka pasur zyrtarë të AAK’së që kanë thënë se edhe afërsia e Haradinajt me Thaçin i ka kushtuar AAK’së me vota?
D. Haradinaj: Gjithsesi se ka reflektuar tek elektorati. Afërsia me Kryeministrin Thaçi na ka kushtuar me vota. Edhe kjo u pa te një pjesë dërrmuese e elektoratit të Aleancës nuk kanë qenë shumë të interesuar të jemi afër. Edhe pse ndoshta neve kemi marrë qëndrim ta mbështesim Qeverinë në disa tema që kemi menduar se janë tema nacionale. Por, sidoqoftë, ne e kemi parë gjendjen reale çfarë e kemi. Është edhe një fakt tjetër, se edhe kryetarët tanë me të vërtetë kanë punuar dhe e kanë ndierë vetën shumë komod, dhe kanë qenë shumë të sigurt në rezultat. Kjo edhe ju ka shpaguar sepse nuk e kanë marrë edhe shumë seriozisht gjendjen reale. Mendoj se Aleanca, tash, duhet ta shohë situatën ndryshe. Është gjendje tjetër sepse janë zgjedhjet nacionale dhe duhet të bëjmë ofertë me programim qeverisës dhe natyrisht me listën zgjedhore. Pse jo edhe t’ua kujtojmë qytetarëve se prapë po iu vjen 100 ditshi i mirë i Kosovës.

Express: Cili është shpjegimi i juaj për Ramush Haradinaj, i cili më 2009 thotë se kurrë s’do të bëjmë koalicion me PDK’në. Edhe ju keni thënë po ashtu. Pas kthimit nga Haga, Haradinaj ka thënë po me PDK’në me kusht që Thaçi mos të jetë Kryeministër. Tash, kemi një qëndrim të ri ku thotë se jo me PDK’në?
D. Haradinaj: Nëse kisha mundur me të përmirësuar pak, edhe në të kaluarën qëndrimi ka qenë shumë i qartë: jo me Kryeministër Thaçin. Personalisht e imja është jo me Kryeministrin Thaçi. Nuk bëjmë koalicion me PDK’në në rast se Aleanca nuk e udhëheq Qeverinë.

Express: Pas zgjedhjeve të vitit 2009, ku keni folur për herë të parë për Express dhe keni thënë se kurrë më Thaçin dhe PDK’në?
D. Haradinaj: Jo me Kryeministër Thaçin. Prapë e përsërisim se me kthimin e Ramushit nga Haga ka qenë për ta ndërruar gjendjen për shkak se kemi qenë të bindur se kjo Qeveri nuk mundur ta ndryshojë gjendjen.

Express: Cili është qëndrimi tash?
D. Haradinaj: Qëndrimi jonë është sikurse ka qenë gjithmonë: Kryeministri Thaçi dhe kjo Qeveri duhet të shkojnë në shtëpi. Ka ardhur koha dhe këta janë akumuluar. Janë shpenzuar dhe nuk kanë energji më për t’i çuar proceset përpara. Për mos me thanë se jemi duke e degraduar udhëheqjen e Kosovës. Dhe, ne po insistojmë me çdo kusht se nëse kjo Qeveri kish ecur vitin e kaluar, gjendja në Kosovë do të ishte më e mirë. Por, shumë shpejt, besoj se kjo Qeveri do të shkojë në opozitë.

Express: Ta qartësojmë edhe pak. Cili është qëndrimi juaj për një koalicion të mundshëm me PDK’në?
D. Haradinaj: Mendoj se kjo Qeveri dhe ky subjekt politik që e ka udhëhequr Kosovën deri tash ka ardhur koha të shkojë në opozitë. Është në të mirë të PDK’së të shkojë në opozitë për shkak se ku je në opozitë i sheh defektet që i ke bërë. Por, është edhe në të mirën e Kosovës që kjo Qeveri, këta njerëz që e udhëhequr Kosovën sot duhet të bëhen pjesë e opozitës dhe duhet të pastrohen pak. Neve kemi qenë shumë të vetëdijshëm kur kemi dalë në opozitë më 2007 se duhet shumë me u pastru. Duhet me pa vetën se ku kemi gabuar në proces dhe natyrisht me u përgatit për një proces të ri zgjedhor për me marrë pushtetin. Kjo Qeveri duhet të shkojë në shtëpi sa më shpejt. Për shkak se çdo ditë e qëndrimit në pushtet i shkakton dëme më të mëdha vendit.

Express: Nuk morëm përgjigje sa i përket një koalicioni PDK-AAK?

D. Haradinaj: Mendoj që zgjidhja më e mirë për Kosovën do të ishte një koalicion LDK-AAK. Por, gjithsesi unë nuk po vendosi vija të kuqe se nuk është e drejta e imja. Nuk jam unë ai që marrë vendime në parti. Por, unë mendoj se Partia Demokratike duhet me dalë në opozitë.

Express: Jo koalicion me PDK’në?
D. Haradinaj: Unë mendoj që kjo Qeveri duhet të shkojë në shtëpi. Ky subjekt politik duhet me dalë në opozitë. Dhe, ky subjekt politik duhet me u marrë me vetveten për katër vjetët e ardhshme.

Express: Ku është Blerim Shala, Nënkryetar i Parë i AAK’së?
D. Haradinaj: Është në aktivitete të zakonshme në cilësinë e Nënkryetarit dhe po i ushtron të gjitha funksionet që i ka dhe të gjitha përgjegjësitë. Është akoma pjesë e dialogut, edhe pse dialog për momentin nuk ka. Por, gjithsesi ne mendojmë se ky dialog veç ka filluar të konsumohet për shkak se gjendja në terren nuk ka ndryshuar në aspektin pozitiv. Kemi pasur do zgjedhje në Veri, por kaq ka ndodhur. Ka ardhur koha që Qeveria e ardhshme që ato marrëveshje me i zbatu në Veri. Po mendoj se jemi vetëm duke humbur kohë në këtë proces.

Express: Keni kërkuar shkarkimin e kësaj Qeveria, ndërkohë që z. Shala vazhdon të jetë pjesë e një ekipe të Qeverisë që merret me dialog…
D. Haradinaj: Mendoj se nuk është pjesë e Qeverisë.

Express: Është pjesë e një ekipe të Qeverisë që merret me dialog?
D. Haradinaj: Është përfaqësues i Aleancës në dialogun me Serbinë. Kemi menduar se është shumë e rëndësishme prezenca e një personi të fuqishëm me përvojë të madhe në dialogim siç është z. Shala për shkak edhe se po e themi edhe një herë se është dialoguar për Kosovën. Nuk është dialoguar për subjektin Partia Demokratike, por për situatën reale që ekziston, siç është Veriu. Pa një pjesëmarrje të Blerim Shalës, unë, mendoj se edhe më keq ishim dalë nga ky dialog. Blerim Shala e ka ushtruar detyrën e vet dhe përgjegjësitë e veta. Ne i kemi dhënë mbështetje. Unë i rrijë mbrapa tij dhe subjekti politik për ato qëndrime që i ka thënë.

Express: Sa e ka dëmtuar AAK’në qëndrimi i z. Shala në krahë të Kryeministrit në dialog?
D. Haradinaj: Nuk duhet ta shohim gjithmonë a i merr do vota apo i humb do vota kur janë në pyetje temat nacionale. Në politikë lidershipi ka edhe kosto. Duhet me marrë edhe përgjegjësi. Ne e kemi marrë këtë përgjegjësi në mënyrë të vetëdijshme. Natyrisht, se shumicën e rasteve i kemi pasur edhe vërejtjet tona. Po ashtu, me ndërhyrjen tonë kanë ndodhur edhe ndryshime. Ka edhe raste kur edhe unë kam qenë pjesë e disa temave që kemi ndërhyrë dhe kemi kushtëzuar për shkak se kemi menduar që është duke u dëmtuar pala jonë. Por, mendoj se një kosto ka qenë pjesë e paketës së bisedimeve. Por, në këtë aspekt nuk e shoh që Blerim Shala është përgjegjës. Neve si subjekt politik e kemi marrë vendimin dhe i kemi dhënë mbështetje. Sidoqoftë, ne jemi të gatshëm ta pranojmë atë rezultat.

Express: A po dështon mocioni i AAK’së për rrëzimin e Qeverisë?
D. Haradinaj: Mocioni i AAK’së nuk po dështon, mirëpo, subjektet opozitare nuk po e shohin qartë që kjo nuk është për ta marrë dikush bajrakun, por qëllimi i vetëm është ndryshimi i gjendjes dhe ndryshimi i Ekzekutivit. Nuk mendoj se duhet të shkojmë në zgjedhje me shpërbërjen e Kuvendit, por duhet të shkojmë në zgjedhje me shpërbërjen e Qeverisë.

Express: Cili është vlerësimi juaj për themelimin e Tribunalit ndërkombëtar për dënimin e krimeve të luftës që kanë ndodhur në Kosovë?
D. Haradinaj: Mendoj se Kosova ka mekanizma të mjaftueshëm ndërkombëtarë të drejtësisë. Nëse rastësisht e shohim të kaluarën, Kosova e ka dëshmuar se është e hapur për të bashkëpunuar me drejtësinë kur janë në çështje proceset e luftës. Nuk e kemi vetëm një rast, por kemi shumë raste dhe nuk është turp ta përmendim edhe rastin kur prej pozitës së Kryeministrit ka shkuar për t’u ballafaquar me drejtësinë. Kosova nuk ka nevojë të frikësohet prej drejtësisë. Por, në rast se ky Tribunal krijohet jashtë Kosovës dhe krijohet vetëm për luftën e Kosovës, mendoj se Kosova do ta paguajë në aspektin afatgjatë si imazh dhe unë jam i bindur se edhe faktori ndërkombëtar dhe miqtë tanë ndërkombëtarë, të cilët, ndoshta janë duke insistuar për të krijuar një Tribunal, duhet ta kuptojnë drejt se ka mekanizma të mjaftueshëm në Kosovë, qoftë vendorë, qoftë ndërkombëtarë për t’i gjykuar ato dyshimet e pretenduara për krime gjatë luftës. Por, nuk mendoj se i bëjmë mirë Kosovës, në rast se ne e kemi një Tribunal të veçantë vetëm për Kosovën, i cili do t’i gjykonte krimet e supozuara në Kosovë. Kemi dëshmuar se jemi për bashkëpunim me drejtësinë, por edhe drejtësia duhet të jetë deri diku e hapur edhe e vërtetë për Kosovën. Nuk ka pasur në Kosovë krime të luftës. Ka pasur në kuptimi individual dhe është e drejtë e çdokujt për të dyshuar, por krijimi i një Tribunali e dëmton imazhin e Kosovës në kuptimin afatgjatë.

Express: A është qartësuar deri në fund pronësia e ndërtesës “Pandora”?
D. Haradinaj: E falënderoj sidomos Express-in, edhe pse nuk pajtohem shumë me juve si medium. Nuk e fsheh këtë fakt dhe më ka ndihmuar shumë Gazeta Express, e cila menjëherë pas reagimit tim i publikoi emrat e pronarëve. Sinqerisht, asnjë gjë të keqe nuk kam ndaj atij objekti, por mua më pengon se si opinionit publik me ia shpjegu se nuk kam lidhje me atë objekt. Se ai objekt është i dikujt tjetër. Objekti ka filluar të ndërtohet në kohën kur nuk kam qenë i lirë për katër vjet. Por kam qenë pushim për katër vjet. Kur kam dalë prej pushimit e kam gjet atë objekt në ndërtim e sipër. Tash, Kosova e ka kuptuar se kush janë pronarët. Kosova duhet të kuptojë edhe një gjë se kush janë banorët, sepse është shumë me rëndësi. As banorët dhe as pronarët nuk janë as njerëz të afërt me AAK’në. Le që nuk janë në Aleancë, por janë me partinë që është në pushtet.

FARK’u ishte një bindje politike

Express: Është hapur një debat në Kuvendin e Kosovës për FARK’un. Xhavit Haliti tha se s’ka pasur kurrë FARK, ndërsa zyrtarët e LDK’së e thanë të kundërtën. Ka pasur apo jo FARK gjatë luftës?
D. Haradinaj: Tendenca për krijimin e strukturave ka pasur permanent. Ka pasur LKÇK. Ka pasur grupe të armatosura. Ka pasur UÇK. Ka pasur tendenca për krijimin e Forcave të Armatosura të Republikës së Kosovës nga Qeveria e Përkohshme e z. Bukoshi. Qëllimi ka qenë i njëjtë. Qëllimi ishte shumë më i madh se sa vetë prezenca se çfarë ngjyre ke pasur. Nëse flasim për dallimet e kohës kanë ekzistuar. Edhe kjo është fakt dhe nuk mundet të mohohet. Në rast, se qëllimi ka qenë i njëjtë për të larguar Serbinë nga Kosova, unë, mendoj se nuk ia vlen as të diskutohet a ka pasur diçka tjetër apo s’ka pas. Të gjitha forcat që kanë qenë të armatosura qëllimin e vetëm e kanë pasur largimin e Milloshevicit prej Kosovës. Dhe, ai qëllim është mbërritur falë një sakrifice shumë, shumë të madhe. Pa i përjashtuar trupat e Brigadës 138, të cilat kanë qenë të mbështetura nga z. Bukoshi. Po ashtu, edhe nga Shtabi i Përgjithshëm, pa i ditur detajet se çka është diskutuar mes Qeverisë në Ekzil dhe përfaqësuesve të UÇK’së sepse kam dëgjuar se ka pasur takime. Z. Bukoshi ka thënë se që edhe i ka mbështetur financiarisht. Por, unë s’kam qenë pjesë e asaj sepse gjatë gjithë luftës në Kosovë s’kam qenë në Shqipëri asnjëherë. Nuk i di rrethanat, por e di që në Kosovë kur ka nisur ardhja e trupave nga Shqipëria, dakordimi i përbashkët mes Ramush Haradinajt dhe Tahir Zemajt ka qenë a keni ardhur ta luftoni Serbinë. Dhe, përgjigja ka qenë po. I kemi bashkuar pushkët për të njëjtin qëllim.

Express: Pra, mund të konstatohet se ka pasur FARK?
D. Haradinaj: Bindje politike mund të themi se ka pasur më shumë se sa FARK. Se FARK është një organizatë sikurse ishte edhe UÇK një organizatë. Mirëpo, ka pasur dallime politike. Dikush s’ka qenë me LDK’në dhe ndoshta kanë pasur të drejtë. Disa të tjerë kanë menduar se nuk duhet t’i mbështesin forcat e UÇK’së, të cilët në atë kohë u quajtshin LPK.

Express: Pas luftës kanë ndodhur disa vrasje politike. Tahir Zemaj të cilin e përmende s’është më. Pse s’po zbardhen këto krime?
D. Haradinaj: Mendoj se drejtësia duhet shpejt të veprojë. Duhet të shpaloset e vërteta. Sa më shumë të zgjatet aq më shumë zgjaten thashethemet rreth raste. Kohëve të fundit janë parë shumë sene. Personalisht, kam parë edhe në mediumin e juaj, disa incizime dhe disa storie. Tash, nuk dua të flas shumë hapur për temën, por kur ka qenë Tahir Zemaj dëshmitar kundër meje ka qenë jashtëzakonisht pozitiv në raport me mua. Edhe ai e ka shuar edhe argumentin e fundit që dikush prej neve me qenë kundër tij.

Express: Këto vrasjet politike në Rajonin e Dukagjinit ishin ri-aktualizuar nga Gazmend Muhaxheri, ndërkohë Armend Zemaj në një intervistë televizive ka thënë se Hashim Thaçi dhe Ramush Haradinaj dinë më së shumti për vrasjet politike…
D. Haradinaj: Unë mendoj se Armend Zemaj di më shumë se unë. Por, në rast se di më shumë atëherë janë organet e drejtësisë dhe duhet t’iu drejtohet atyre sikurse edhe Kryetari i Pejës. Këto janë akuza shumë të rënda dhe serioze. Nëse ata dinë këso gjërash duhet të shkojnë në organet e drejtësisë për t’i denoncuar dhe deponuar deklaratat dhe pastaj për të proceduar rastin. Nuk shkohet më me këso fjalësh për shkak se po ju shkaktojmë vuajtje edhe atyre familjeve të të dëmtuarve. Mendoj se është turp për neve, në rast se unë për shembull di diçka dhe nuk shkoj ta denoncoj, qoftë edhe e kundërta. Mendoj se nuk është koha për me iu shkaktuar më vuajtja atyre familjeve, të cilët i kanë humbur vëllezërit ose djemtë. Ajo që është më e rëndësishmja kushdo që ka informacione duhet të lajmërohet të organet e drejtësisë. Edhe drejtësia herët apo vonë do t’i zbardhë dhe do të vërtetohen të gjitha.

Express: Pse koalicion me LDK’në?
D. Haradinaj: Ne e kemi një përvojë të mirë me LDK’në. Ne e kemi në përvojë jashtëzakonisht të mirë mes koalicionit mes Rugovës dhe Haradinajt në vitin 2004. Qëllimi jonë është t’ia kthejmë Kosovës edhe një herën atë frymën e fuqishme të 100 ditshi. Edhe qëndrimet e afërta me LDK’në e shoh si shumë të mundshme një Qeveri të suksesshme të jetë AAK-LDK, por pa i përjashtuar edhe ekspertët nga shoqëria civile, edhe nga organizatat politike që ndoshta edhe kishim mundur të japin kontributin. Por, mendoj se këta që e kanë qeverisë Kosovën pa të keqen e askujt duhet të shkojnë në opozitë për një kohë të caktuar. Për shkak se nuk mund të qojnë më proceset përpara.

AAK vendos nëse do të jem kandidat për deputet

Express: Shumëkujt i intereson se a do të kandidoni përsëri për deputet pasi dihet se e keni vëlla Kryetarin e AAK’së?
D. Haradinaj: Të gjitha këto gjëra merren në forume të partisë. Në rast se subjekti politik e përcakton se unë duhet të jem prapë kandidat për deputetë edhe do të jem. Nëse subjekti politik mendon se unë nuk duhet të jem kandidat mua nuk më pengon. Megjithatë, po e përsëris prapë gjatë luftës kam qenë komandant i një brigade jashtëzakonisht të suksesshme dhe kam pasur rreth dymijë ushtarë. Rreth 370 i kam dëshmorë. I kam mbi 400 invalidë të luftës dhe shumë prej tyre janë me shkallë të invaliditetit mbi 70 për qind. Të gjithë këta njerëz janë të lidhur me Daut Haradinaj dhe e votojnë Aleancën dhe e votojnë Daut Haradinajn pa i përjashtuar edhe lidhjet e mia me shumë struktura të UÇK’së për të cilat ndihem krenar që ju takoj atyre njerëzve që kanë dhënë shumë për Kosovën.

Express: Por, nuk e keni shumë të qartë nëse do të kandidoni për deputet?
D. Haradinaj: Në rast se partia mendon se unë i sjell vota subjektit politik do të jem kandidat. Në rast se jo nuk do të jem kandidat. Por, ai vendim nuk është i Daut Haradinajt.

Express: Ka pasur disa dënime të kryetarëve të komunave dhe rasti i fundit edhe i Ramadan Mujës. Cili është vlerësimi juaj, a duhet të shkojnë këta njerëz në shtëpi derisa t’i përfundojnë procedurat gjyqësore?
D. Haradinaj: Mendoj se një shembull të mirë duhet ta kenë edhe largimin e Ramush Haradinajt nga pozita e Kryeministrit dhe ballafaqimi i tij si qytetar i Kosovë me drejtësinë. Mendoj se ky shembull duhet të vlejë për të gjithë. Sidomos, për ata përgjegjës politik që e kanë marrë një proces mbi supe siç është Ramadan Muja, siç është rasti i Ferizajt. Por, në këtë rast e kisha përshëndet Bajrush Xhamajlin, sepse e ka marrë një vendim të drejtë dhe nuk ka kandiduar edhe për shkak se ka pasur mundësi juridike. Mendoj se kushdo që është një zyrtar publik, i cili është i akuzuar duhet të largohet deri në përfundim të procedurave gjyqësore. Në rast se drejtësia e vërteton se ai është i pafajshëm le të vazhdojë punën sikurse më shumicën e rasteve. Po flas edhe një herë nuk është e lehtë kur kemi plot raste kur janë ballafaquar me drejtësinë. E harrojmë edhe Lahi Ibrahimaj. Edhe ai ka qenë një kolonel në afërsi për t’u graduar në Gjeneral dhe e ka palu uniformën dhe e ka veshurrrobat civile, ka shkuar dhe është lajmëruar në ora 10 ka hipur në aeroplan, është ballafaquar me drejtësinë dhe është kthyer në Kosovë. Pra, duhet të jemi shumë të vetëdijshëm se ne po e lëndojmë drejtësinë në Kosovë. Në rast se ne sot fshihemi pas pozitave, ky është një gabim i madh.

Express: A po themelohet Tribunali si pasojë e kësaj brishtësia të sistemit të drejtësisë?
D. Haradinaj: Këto janë elemente që kur të grumbullohen ndoshta edhe kanë ndikuar. Por, nuk e përjashtoj edhe faktorin Serbi dhe presionin serb. Të gjitha këto akuzat janë ndërtuar prej Serbisë. Unë kam kaluar nëpër atë proces dhe kam parë dhe të gjitha këto akuza janë bërë në Beograd, janë bërë nga ish-UDB e Miloshevicit. Shumica e dëshmitarëve janë përpunuar sepse s’kanë pasur as lidhje me luftën. Është vërtetuar se s’kanë qenë në luftë dhe s’e kanë parë asnjëherëluftën, por janë përpunuar. Unë kam pas rastin të shoh dëshmitarë në sallën e Tribunalit të Hagës. Nuk po dua të jap emra, por një dëshmitar ka thënë se UDB në Beograd kështu e ka përpunuar një dëshmitar. Sidoqoftë, edhe një herë po e them se një shtet i ri, i cili pretendon të jetë shtet ligjor duhet të ketë shumë kujdes kur ka të bëjë me drejtësinë. Drejtësia duhet të trajtojë të gjithë qytetarët në mënyrë të barabartë. Nuk ka Kryetar komune, zyrtarë apo komandantë, por duhet secili të jetë i barabartë. Në rast se e keni parasysh një rast, një serb i dënuar me 20 për masakra në Kosovë, ka bërë aksident dhe ka vdekur bashkë me familje në Beograd. A është dashur dikush ë interesohet se ai serb ka qenë dashur të jetë në burg apo në liri dhe me konsumu alkool dhe me humb jetën në aksident. Ky është rasti i drejtësia në Serbi asnjëherë s’funksionon.

Express: Pas protestave në UP keni thënë se radhën e ka RTK’ja….?
D. Haradinaj: Në rast se lexohet me kujdes dhe për çka RTK’ja dhe për çka QKUK’ja sepse nuk i ndajë pasi janë institucione shumë të rëndësishme në Kosovë. RTK e ka detyrë me informu qytetarin për zhvillimet brenda shoqërisë në Kosovë. Është medium publik, financohet nga qytetarët e Kosovës dhe e ka për obligim për ta informuar qytetarin drejt pavarësisht se a i pëlqen apo jo dikujt. Nëse e marrim QKUK’në, kjo e ka për detyrë t’i shërojë qytetarët dhe të gjej format…. Informimi nuk ka qenë i drejtë kur flasim për rrethanat e universitetit. Unë personalisht e kam mbrojtur Ibrahim Gashin sepse kam menduar se ai nuk është kryefjala e fjalisë, nuk është kryeproblemi. Por, edhe ky që ka ardhur sot të njëjtin ballafaqim do ta ketë. Sepse aty është akumuluar politika tash e 15 vjet…. Ka qenë absurd se si prej pozitës së Zëvendësministrit bëhet rektor. Po ashtu, edhe u.d i Rektorit, Anton Berishaj është po ashtu politik pasi ka fotografi nëpër tubime politike… Edhe RTK’ja me kosto shumë të madhe, me buxhet të jashtëzakonshëm dhe natyrisht se ka suksese të mëdha që po hapen kanale të reja dhe ne i mbështesim. Atë që nuk e mbështesim është kur nuk ka informim të drejtë. Aq më tepër kur kanë thënë na ka kërcënuar. Çka është kërcënim? Kërkesa për informim të drejtë nuk është kërcënim. Gabim është kur ata nuk e kanë informuar si duhet qytetarin. Gabim është kur protestuesit e kanë sulmuar qytetarin. Ka qenë gabim kur politika ka hyrë te studentët.

Express: Por, është problem një politikan me dhanë vlerësime profesionale për një medium?
D. Haradinaj: Po flas të cilën është ndodhur universiteti. E kam pasur fjalën për ngjarjet që janë zhvilluar para dyerve të UP’së. Nuk kam folur për RTK si medium publik se i ka ndihmuar një subjekti politik. Sa i përket raportimit për ngjarjet që kanë ndodhur para Rektoratit RTK nuk ka qenë në nivelin e kënaqshëm. Arsyet ata i dinë, unë nuk i di. Për shembull: është e pandershme kur e sheh një medium publik duke transmetuar drejtpërdrejt duke sulmuar policinë ose anasjelltas. Ose në një medium tjetër ka kronikë standard që ndoshta edhe nuk iu kanë bërë shumë përshtypje.