Dalin pensionet me rritje

Ministria e Financave (MF), ka njoftuar se ka bërë ekzekutimin e pensioneve sipas vendimit të Qeverisë së Kosovës për rritjen e pensioneve.

Ministria e Financave nepërmjetë një komunikate për shtyp ka njoftuar të gjithë pensionistët se ka bërë ekzekutimin e pensioneve me rritje sipas vendimit të Qeverisë të datës 4 tetor.

“Ekzekutimi i pensioneve me rritje tregon edhe njëherë përkushtimin e Qeverisë së Kosovës ndaj pensionistëve”, ka njoftuar Ministria e Financave.

Ndryshe sipas vendimit të Qeverisë së Republikës së Kosovës, për pensionistët kontribut pagues pensioni rritet për 40 për qind. 26.45 për qind e rritjes do t’iu paguhet nga janari 2012 ndërsa pjesa tjetër nga janari 2013. Pensionet bazë, do të rriten në vlerë prej 33.3 për qind. 11.1 për qind e rritjes do t’u paguhet shfrytëzuesve që nga 1 janari 2012, kurse lartësia tjetër e rritjes do t’iu paguhet që nga janari 2013.

Edhe pensionet e aftësisë së kufizuar do të rriten në lartësi prej 33.3 për qind. 11.1 për qind e kësaj rritje do t’u paguhet shfrytëzuesve që nga 1 janari 2012, kurse lartësia tjetër e rritjes do t’iu paguhet që nga janari 2013.

Nga kjo rritje e pensioneve do të përfitojnë 164 mijë e 200 pensionistë. 112 mijë përfitues të pensioneve bazë, 35 mijë pensione kontributdhënëse dhe 17 mijë 200 përfitues të pensioneve për aftësi të kufizuar.