Daka: Në rast nevoje, KQZ e gatshme për zgjedhje

Kryetarja e Komisionit Qendror të Zgjedhjeve, Valdete Daka, ka thënë se ky institucion është i gatshëm për organizimin e zgjedhjeve kurdo që ato shpallen.

Për të dalë nga ngërçi politik opsion janë edhe zgjedhjet e reja. Kryetarja e Komisionit Qendror të Zgjedhjeve, Valdete Daka, ka thënë se ky institucion është i gatshëm për organizimin e zgjedhjeve kurdo që ato shpallen.

Në një intervistë për RTK, Daka ka vlerësuar se zgjedhjet e njëpasnjëshme, përveçse janë sfiduese, bartin edhe rreziqe të ndryshme.

Por, Komisioni Qendror i Zgjedhjeve, siç ka thënë ajo, e ka obligim kushtetues organizimin e zgjedhjeve. Prandaj, sipas saj, sa herë të shpallen zgjedhjet, KQZ-­ja do t’i organizojë ashtu siç parashihen në Kushtetutë dhe ligjet në fuqi.

‘Mirëpo zgjedhjet e njëpasnjëshme janë sfiduese dhe bartin me vete rreziqe të ndryshme, prandaj edhe do të paraqesin vështirësi’, ka deklaruar Daka.