Çmimi “Mbretëresha Teutë” i ndahet Shukrije Ramadanit

Çmimi në fjalë asaj i është ndarë për aktivitetin e palodhshëm humanitar si dhe për përpjekjet e saj për ruajtjen e identitetit shqiptar jashtë atdheut.

Në 10 vjetorin e formimit të shoqatës Teuta në Zagreb është mbajtur dje një aktivitet festiv. Me këtë rast, udhëheqësja e kësaj shoqate, regjisorja e njohur shqiptare nga Kroacia, Shenida Bilalli ia ka ndarë shpërblimin e parë “Mbretëresha Teuta” zonjës Shukrije Ramadani, drejtoreshë e Qendrës Kulturore të Kosovës në Cyrih.

Çmimi në fjalë asaj i është ndarë për aktivitetin e palodhshëm humanitar si dhe për përpjekjet e saj për ruajtjen e identitetit shqiptar jashtë atdheut.
Ndarja e këtij çmimi është bërë në prani të institucioneve më të larta të shtetit kroat dhe të përfaqësuesve të Ambasadës së Kosovës në Zagreb.

Me këtë rast edhe Shoqata e Luftëtarëve Shqiptarë në luftën atdhetare të Kroacisë, ndau një Mirënjohje të veçantë për heroin e gdhendur në memorjen e kombit, Agim Ramadanin, për kontributin e dhënë në shërbim të atdheut.

Në këtë përvjetor të shoqatës “Teuta” një çmim iu nda edhe Diana Toskës për idenë e krijimit të himnit të Nënë Terezës.

Programin e begatoi edhe paraqitja e grupit teatral “Aktrimi” nga Zvicra i cili u mirëprit ngrohtësisht nga publiku. Grupi Aktrimi sot do të paraqitet para publikut të arbëreshëve të Zarës me pjesën tashmë të njohur teatrale nga repertori i tij, ”Nuk erdhi Veliu”./albinfo/