Cliff: Pa perspektiva i shtyn të rinjtë të shkojnë në luftë jashtë Kosovës

Ambasadori i Britanisë së Madhe në Kosovë, Ian Cliff, iu ka bashkuar shqetësimeve të ngritura lidhur me rastet e shkarjes së të rinjve nga Kosova në vendet e tjera për të luftuar.

Cliff ka shfrytëzuar të mërkurën transportin me tren, që të arrijë në Ferizaj dhe të takojë strukturat drejtuese të Ferizajt dhe të vizitojë Kishën Ortodokse.

Pas takimit me kreun e Komunës së Ferizajt, Muharrem Sfarqa, ambasadori Cliff e ka vlerësuar si shumë të mirë bashkëpunimin me komunën e Ferizajt, ndërsa ka përshëndetur edhe një nismë të mirë të komunës në vendosjen e kontakteve në mes Ferizajt dhe një komune të Mançesterit të Anglisë.

Ambasadori Cliff, iu ka bashkuar shqetësimeve të ngritura lidhur me rastet e shkarjes së të rinjve nga Kosova në vendet tjera për të luftuar.

Duke komentuar rastin e fundit të riut ferizajas, i vrarë në Irak, ambasadori Cliff ka thënë se nuk duhet ta ekzagjerohet kjo çështje, duke thënë se mungesa e perspektivës ndoshta po i shtyn të rinjtë të marrin hapa radikalë.

“Ka mjaft të rinj që ndoshta këtu nuk po e shohin perspektiven e vet dhe për shkak të papunësisë dhe aspekteve tjera po nxiten që të marrin veprime të tilla” ka thënë Cliff

Në anën tjetër, kryetari i Ferizajt, Muharrem Sfarqa, e ka vlerësuar këtë vizitë, duke thënë se gjatë takimit janë biseduar tema të rëndësishme që lidhen me marrëdhëniet në mes të Ferizajt, si pjesë e rëndësishme e Kosovës dhe Britanisë së Madhe.

Duke iu përgjigjur interesimit të mediave se pse kishte zgjedhur udhëtimin me tren dhe se kur do të fillohet të lëvizet lirshëm me tren edhe jashtë kufijve të Kosovës drejtë Evropës, ambasadori Cliff ka thënë se edhe hekurudhat paraqesin një problem, i cili sigurisht që do të zgjidhet përmes procesit të dialogut me serbin në një fazë të ardhshme.

Ambasadori Ian Cliff për pak kohë është ndalur edhe në Kishën Ortodokse të Ferizajt, ndërsa nga kryetari i Ferizajt, Muharem Sfarqa, ka marr edhe një portret të punuar në dru të Nënë Terezës, në shenjë të miqësisë së Ferizajt me Mbretërinë e Britanisë së Madhe. /Telegrafi/