Çka po bën Lorik Cana pas pensionimit nga futbolli?

Lorik Cana është në kërkim të një jete të re pasi është pensionuar nga futbolli aktiv. Legjenda e futbollit shqiptar nuk do të ndahet krejtësisht nga futbolli sidomos tani kur babai i tij, Agim Cana, është bërë president i njërit prej klubeve më me nam në futbollin kosovar, Vëllaznimit, prej nga edhe rrjedh familja Cana, raporton “Zëri.info”.

Është pikërisht klubi kuq e zi në të cilin Lorik Cana do të jap kontribut për ngritjen e tij. Por, paraprakisht po mundohet të bëhet një biznesmen i suksesshëm për t’i parë sadopak hairin edhe Kosova.

“Po merrem me disa shokë në Shtetet e Bashkuara të Amerikës për të pasur një biznes që do të ndihmojë edhe Kosovën. Ndërkohë që po e ndihmoj edhe babain tim që sapo është bërë presidenti i Vëllaznimit të Gjakovës”, ka deklaruar Cana. Cana u pensionua në vitin e kaluar nga futbolli aktiv dhe emri i tij ka zënë vend të posaçëm në historinë e Kombëtares Shqiptare dhe të futbollit shqiptar në përgjithësi. /Zëri/