Çka deklaruan pas derbit, Munishi e Nuhiu

Munishi ka deklaruar se e ka respektuar Dritën duke ia shënuar një gol, pasi sipas tij skuadra e drejtuar nga Ardian Nuhiu e ka respektuar skuadrën e tij.

“Unë vij nga një nivel tjetër i futbollit. Di të shënoj edhe pesë gola, por kësaj radhe na ka respektuar më shumë Drita dhe ne nuk shënuam më shumë se një gol. Ato që na respektojnë nuk do t’i shënojmë më shumë se një gol”, ka thënë Munishi.

Këtë fitore Munishi ia ka dedikuar tifozëve të kësaj skuadre “Skifterave”. Munishi thotë se skuadra e tij ka treguar fuqi të madhe në këtë sezon.
“Është kënaqësi e madhe dhe të jem i sinqertë fitoren ia dedikojmë tifozëve. Ne kemi treguar fuqi të madhe në këtë kampionat. Gjilani meriton këtë sukses, jemi një klub që meriton respekt për tifozët për kryetarin e klubit. Nëse vazhdojmë kështu, kjo është skuadra kampione me luftë dhe angazhim. Drita ka skuadër të mirë me individ të mirë, por fituam me profesionalizëm dhe i kemi neutralizuar disa lojtar”, është shprehur Munishi.

Ndërsa, trajneri i Drites, Nuhiu ka thënë se në derbi nuk mund të krijosh shumë raste. Ai ka thënë se Gjilani e shfrytëzoi rastin e vetëm të cilin e kishte duke shënuar gol.
“Në derbi nuk mund të krijosh shumë, ne kishim dy raste të pastra dhe nuk shënuam. Kundërshtari nga një rast i vetëm arriti të shënoj dhe fitoj. Ishte një ndeshje e luftuar nga të dy skuadrat, që ishim maksimalisht të kujdesshme për të mos pësuar. Fusha nuk na lejoi të luanim shpejtë dhe na penalizoi, por ky nuk është arsyetim. Duhej të shfrytëzoheshin ato pak raste që i patëm”, ka thënë Nuhiu.

Ai ka kërkuar që ta harrojnë humbjen ndaj Gjilanit dhe të mendojnë për duelin e radhës.
“Kampionati është i barabartë me të gjitha skuadrat që po tregojnë paraqitje të mira. Kampionati është i hapur, duhet ta harrojmë këtë ndeshje dhe të mendojmë për duelin e radhës që na pret”.