Ç`ka deklarojnë para derbit Morina e Isufi

Gjilan – Derbi i 25-të, në mes Gjilanit e Dritës do të jetë mjaft interesant, përpos faktit se dy skuadrat janë në formë të mirë dhe kryesisht gjenden në pjesën e epërme të tabelës së klasifikimit.

Dy trajnerët Arbnor Morina i Gjilanit e Bekim Isufi i Dritës, janë mjaft optimist për skuadrat e tyre para derbit të “zjarrtë”, i cili zhvillohet nesër duke filluar nga ora 13:00.

Trajneri i Gjilanit, Arbnor Morina, ka theksuar se do të jetë festë futbollistike.
“Nuk ka dyshim është derbi ma i madh në vend, ku nuk mungon në asnjë moment spektakli në tribuna e në fushë, skuadra ime është e përgatitur për këtë ndeshje si për të gjitha ndeshjet që i kemi zhvilluar gjerë më tani, do të japim gjithçka nga vetja për rezultat pozitiv por dyshoj se “armiku” ma i madh i këtij derbi do të jetë fusha e cila do t’na pengon që të zhvillohet ndeshje e mirë, natyrisht që pres nga “Skifterat”, që edhe nesër të jenë shembull, të na përkrahin ashtu siç din, ndërsa natyrisht edhe “Intelektualët” së bashku me “Skifterat” e bëjnë edhe ma të hijshme derbin i cili është i paparashikueshëm gjatë 90 minutave”.

Trajneri Bekim Isufi, i cili në mënyrë triumfale është rikthyer tek skuadra e Dritës pret spektakël futbollistik.
“Është kjo ndeshja e fundit vjeshtor dhe kjo ndeshje është mjaft e rëndësishme për ne, edhe pse është derbi i paparashikueshëm shpresojmë në rezultat pozitiv, duke u bazuar gjithmonë në grupin e futbollistëve që kemi dhe tifozët tanë që na përkrahin në çdo ndeshje pa marrë parasysh ku i zhvillojmë ndeshjet, andaj nga futbollistët e mijë kërkoj angazhim maksimal ndërsa “Intelektualët”, pritet që të dhurojnë spektakël siç din ata”.

Nga 24 derbi të zhvilluar Drita ka 9 fitore, Gjilani një më pak ndërsa 7 derbi kanë përfunduar pa fitues./rajonipress/