Çitaku: Tribunali duhet të votohet në Kuvend, por është proces politik

BE ka refuzuar themelimin e një Gjykate kosovare për dënimin e krimeve të luftës. Themelimi i Tribunalit është i padrejtë historikisht, juridikisht, politikisht për Kosovën. Qeveria e Kosovës nuk ka qenë palë në negocimin e këtij Tribunali. Të krijohet një Gjykatë e cila do të merret ekskluzivisht me krimet të supozuara që kanë kryer shqiptarët kundër serbëve, për mua është e papranueshme. Por, ne duhet ta zgjedhim të keqën më të vogël dhe të votojmë themelimin e saj në Kuvend. Deklarimet e Kurtit dhe Haradinajt se Qeveria është fajtore për Tribunalin janë të pështira dhe neveritëse. Nuk po frikësohemi se do të arrestohen zyrtarë të PDK’së të dyshuar për krime lufte. Nënkryetarja e PDK’së, Vlora Çitaku, flet për Express.

Express: Para disa javësh pati njoftime se ju bashkë me këshilltarin e Kryeministrit Bekim Çollakun, udhëtuat në SHBA për të lobuar kundër një Tribunali që do të trajtonte krimet e supozuara të UÇK’së. Cilat ishin rezultatet e asaj vizite?

V. Çitaku: Thënë të drejtën, bashkë me z. Çollaku kemi qenë në SHBA, mirëpo, agjenda e diskutimeve ka qenë shumë më e gjithëpërfshirëse se sa çështja e themelimit të Tribunalit, apo siç po e quajnë tani Gjykatës Speciale. Ka qenë një agjendë shumë e gjerë dhe është diskutuar për transformimin e Forcave të Sigurisë së Kosovës në Forcat e Armatosura. Pastaj përmbyllja e mandatit të EULEX’it, integrimet europiane dhe normalisht një kaptinë që është prekur është edhe çështja e Tribunalit. Mirëpo, kjo nuk ka qenë arsyeja e vetme pse kemi shkuar në SHBA…

Express: Tashmë dihet se Kosovës i kërkohet të votojë një Gjykatë Speciale, është publikuar edhe drafti. A është ky varianti që i konvenon Kosovës?

V. Çitaku: Po flas shumë hapur, ne, Qeveria e Republikës së Kosovës, Kryeministri Thaçi, Zëvendëskryeministri Kuçi dhe secili prej nesh që ka qenë i përfshirë në këto diskutime e ka bërë shumë të qartë që në fillim që ne do të preferonim që krimet e supozuara në raportin e Dick Martyt të hetohen dhe të gjykohen në Gjykatat e Kosovës. Kemi vlerësuar qysh në fillim se nuk ka nevojë të krijohet një mekanizëm i veçantë.

Express: Megjithëkëtë, askush s’po iu beson institucioneve të drejtësisë kosovare?

V. Çitaku: Mbase është intepretimi më banal që unë e kam dëgjuar.

Express: Por, faktet flasin?
V. Çitaku: E para e punës, institucionet e drejtësisë në Kosovë tani e 15 vite i udhëheqin mekanizmat ndërkombëtarë. Z. Williamson, i cili është hetues i BE’së, ka qenë kryesues i Departamentit të Drejtësisë menjëherë pas përfundimit të luftës. Pra, janë të njëjtit njerëz, të njëjta struktura ndërkombëtare që kanë operuar në rajon dhe që në fakt kanë udhëhequr sistemin e drejtësisë në Kosovë. A është sistemi i drejtësisë i Kosovës si i Finlandës, Zvicrës, Norvegjisë absolutisht jo. Por, a është në nivel të krahasueshëm apo në disa raste edhe më i avancuar se sa vendet e rajonit, absolutisht po. Dua t’ju përkujtoj që qysh në vitin 2011, Qeveria e Republikës së Kosovës, përkatësisht Ministri i Drejtësisë, z. Hajredin Kuçi ka kërkuar nga BE’ja që Kosova të themelojë Gjykatën për krime lufte. Ne kemi kërkuar dhe këto kërkesa i kemi bërë me shkrim. Ministri i Drejtësisë si udhëheqës politik i gjyqësorit ka kërkuar që kjo çështje të rregullohet dhe të themelohet një Gjykatë dhe kjo kërkesë e jona është refuzuar në mënyrë eksplicite nga ana e BE’së. Për më tepër është bërë një nga kushtet apo më mirë të them parakushtet për nisjen e negociatave për Marrëveshjen për Stabilizim Asociim.

Express: Mirëpo, shumëkush kritikon Kryeministrin dhe Qeverinë e Kosovës se i kanë neglizhuar pretendimet e Martyt…

V. Çitaku: E para e punës, raporti i Dick Martyt, kushdo që e ka lexuar, unë e kam lexuar, e sheh se aty nuk ka asgjë të re. Janë të njëjtat gjëra që janë thënë që nga vitit 1999 e tutje. Dhe, janë supozime të cilat janë hetuar qoftë nga Tribunali i Hagës, qoftë nga UNMIK’u, qoftë nga EULEX’i. Ajo çfarë e ka iniciuar hetimin nuk janë të gjeturat e reja. Nuk janë faktet e reja. Ka qenë një momentum politik që ka iniciuar hetimin. Ka qenë një raport i Këshillit të Europës, në të cilin janë përmbledhur raporte të shumta dhe shkrimeve të shumta që janë bërë poshtë e lartë dhe si i tillë ka prodhuar një moment politik. Por, jo një moment të ri në kontekstin juridik, në kontekstin e provave. Pra, ky është një proces i iniciuar, puro, kryekëput nga rrethanat politike. Jo, nga të gjeturat faktike në terren.

Express: Dihet se raporti i Martyt përmend trafikimin me organe? Ndërkohë që spekulohet se aktakuza merret me serbët e zhdukur? A jeni në dijeni se me çka do të merret Gjykata?

V. Çitaku: Kushdo që e ka lexuar raportin e Dick Martyt e di pak a shumë substancën e tij. Por, prapë po e përsëris se nuk ka asgjë në atë raport që është e re dhe s’ka asgjë në atë raport që nuk është hetuar deri më tani. Tani, unë do të doja të them shumë qartë, ky Tribunal ose kjo Gjykatë (për mua është semantik se a e quajmë Gjykatë apo Tribunal), është historikisht, juridikisht, politikisht e padrejtë që Kosovës, po e them, për arsye puro politike po i imponohet një proces i tillë. Kjo nuk do të thotë se ne nuk duhet të merremi me të kaluarën. Ne duhet të merremi me të kaluarën. Ne duhet të hetojmë krimet që kanë ndodhur në Kosovë, qofshin edhe ato të kryera nga shqiptarët kundër serbëve. Mirëpo, të krijohet një Gjykatë e cila do të merret ekskluzivisht me krimet të supozuara që kanë kryer shqiptarët kundër serbëve, për mua është e papranueshme. Shumë më e pranueshme dhe më e lehtë do të ishte të themelohej një Gjykatë për dënimin e të gjitha krimeve që kanë ndodhur në luftën e Kosovës. E dini ju sa krime kanë ndodhur në Kosovë dhe askush asnjëherë as nuk është ndjekur, as nuk është gjykuar e as nuk është dënuar. Kodi Penal i Kosovës nuk e lejon gjykimin në mungesë. Mirëpo, këto me dhjetëra, me qindra krime të cilat nuk janë hetuar asnjëherë dhe të cilat Kosova nuk mund t’i hetojë për shkak të infrastrukturës ligjore.

Express: Shumëkush themelimin e kësaj Gjykate po e sheh si dështimin të kësaj Qeverie. Ramush Haradinaj tha që kjo Gjykatë po themelohet për fajin e Thaçit. Sot, Albin Kurti tha se Gjykata shënon kapitullimin e Thaçit në dialogun me Serbinë dhe si dhuratë po i vjen Tribunali?
V. Çitaku: Thënë të drejtën për mua janë neveritëse dhe të pështira dhe nuk meritojnë as koment deklarimet e tilla. Unë nuk mund të besoj që dikush me mendje të shëndoshë vërtet beson që ne si institucione dhe si Qeveri paskemi dashur themelimin e një Tribunali të tillë. Ajo çka dëshiron Qeveria, ajo çfarë kemi insistuar ne që nga fillimi ka qenë drejtësia dhe vendosja e drejtësisë. Po, ne duam që këto krime të supozuara të hetohen. Kushdo që ka bërë krime duhet të ndëshkohet, duhet të dënohet. Ajo ka qenë luftë dhe në luftë gjëra të tmerrshme mund të ndodhin. Kushdo që ka bërë krime duhet të ndëshkohet. Mirëpo, ky Tribunal, kjo Gjykatë për mua nuk është instrument i drejtësisë. Është instrument për të vendosur një balancë politike. Duhet sqaruar se Qeveria e Kosovës nuk ka qenë palë në negocimin e këtij Tribunali.

Express: Pra, ju është prezantuar ky Tribunal dhe ju jeni gjetur para aktit të kryer?
V. Çitaku: Jo, t’ju them të drejtën është bërë një betejë e madhe. Sepse fillimisht është synuar që kjo Gjykatë të mos jetë nën juridiksionin e Kosovës, por të jetë nën juridiksionin ndërkombëtar. Dhe, ne kemi insistuar që të jetë nën juridiksionin e Kosovës. Po ashtu, kemi insistuar që të ketë një dhomë në Kosovë apo si të themi Zyra Kryesore e Gjykatës, ndërkohë, disa seanca, posaçërisht dëgjimi i dëshmitarëve të bëhet jashtë vendit. Këtu opsion të mirë nuk kemi. Janë dy opsione. Njëri është i keq e tjetri është edhe më i keq. Në rast se ne dështojmë që të themelojmë Gjykatën përmes Parlamentit, ajo gjithsesi do të krijohet nga Këshilli i Sigurimit i OKB’së. Ajo do të ishte edhe një goditje edhe më e madhe për institucionet e Kosovës.

Express: Ambasadori holandez konfirmoi se vendi i tij është duke negociuar me BE’në që Gjykata ose një dhomë e saj të jetë atje. Edhe pse bëhet fjalë për gjykatë e jo Tribunal, fakti që është në Hagë i jep konotacion edhe më negativ…

V. Çitaku: Kam përshtypjen se Holanda është përzgjedhur për shkak të një infrastrukture që tashmë e ka, por nuk ka qenë destinacioni i parë për t’u vendosur dhoma e veçantë për dëshmitarë. Kanë qenë disa shtete të BE’së që u është ofruar kjo kërkesë, mirëpo, të cilat e kanë refuzuar dhe Holanda e ka pranuar sepse ka një infrastrukturë ekzistuese.

Express: Në raprotin e Dick Martyt përmenden edhe disa figura të PDK’së. Po frikësohet udhëheqja e PDK’së se mund të arrestohen ata në ditët në vazhdim?

V. Çitaku: Jo. E para e punës vendimet e kësaj natyre i tejkalojnë konsideratat personale dhe partiake. Për shkak se me vendimet që do të marrim ditët në vijim nuk do të jetojnë vetëm votuesit e PDK’së. Me vendimet që do të marrim ditët në vijim do të jetojnë gjithë qytetarët e Kosovës. Besa do të jetojnë edhe gjeneratat e ardhshme. Unë, besoj se secili prej nesh përkundër emocioneve që ky lajm prodhon – por jo vetëm emocioneve – edhe racionalisht po ta gjykojmë kjo është e padrejtë. Unë nuk pajtohem me ata që thonë se përmes këtij procesi do të pastrohet lufta jonë çlirimtare. Sepse lufta jonë çlirimtare si koncept, si nocion është ide. Populli ngritet për çlirim dhe ideja nuk gjykohet.

Express: Gjatë një takimi mes Presidentes dhe Kryeministrit u tha se kjo Gjykatë nuk kundër luftës çlirimtare, por është kundër individëve?
V. Çitaku: Atë po dua ta them. Por, kjo luftë është bërë prej individëve sepse s’kanë ardhur alienët. E kuptoj përgjegjësinë individuale. Ushtria Çlirimtare nuk ka qenë ushtri e rregullt. Ushtarët nuk janë rekrutuar dhe nuk u janë nënshtruar testeve.

Express: Rrjedhimisht ka mundur të ketë edhe lëshime?

V. Çitaku: Absolutisht. Unë e kam thënë edhe publikisht. Të qenurit pjesëtar i UÇK’së nuk e patenton askënd dhe nuk e imunizon askënd me vlerat më të larta kombëtare, patriotike apo intelektuale. Ato gra dhe ata burra që kanë qenë të mirë edhe para se t’i bashkohen UÇK’së kanë mbetur gra dhe burra të mirë edhe përgjatë saj e edhe pas transformimit të saj. Por, jo të gjithë që kanë qenë në UÇK kanë qenë të tillë. Me shumë prej tyre unë kam mospajtime. Mirëpo, kjo nuk i bën apriori fajtorë për çfarëdo lloj krimi të supozuar kudo në botë. Thënë të drejtën, ky është problemi më i madh që kam me këtë proces. Dhe, jo vetëm me këtë por me krejt mënyrën se si funksionon drejtësia në Kosovë dhe se si perceptohet drejtësia në Kosovë. Kudo në botë ti je i pafajshëm derisa të vërtetohet e kundërta. Këtu ti je fajtor derisa të vërtetohet e kundërta.

Por, anëtarë të partisë tuaj kanë dhënë disa shembuj të këqij sa i përket drejtësisë si Xhabir Zharku?

V. Çitaku: Unë kam folur publikisht kundër tyre. Dhe jam deklaruar publikisht kundër tyre. Drejtësia nuk është tavolinë suedeze, ku i merr ato që të pëlqejnë dhe lë anash pjesë që nuk të pëlqejnë. Sistemi i drejtësisë vjen në pako dhe duhet të pranohet si i tillë dhe nuk duhet të vihet në pikëpyetje. Unë po e them prapë, kjo Gjykatë në mënyrën se si e kemi tani është e keqja më e vogël. Nuk e quaj as lajm të mirë se po e shoh që dikush po thotë se është mirë se po pastrohemi. Nuk bëhet katarsisi shoqëror dhe reflektimi mbi të kaluarën përmes proceseve gjyqësore. Ajo është vetëm një prej komponentëve të tij. E dyta, më mllefos fakti që disa për shkak të konsideratave politike ndaj atyre që sot rastësisht janë bartës të një subjekti politik janë në gjendje të mohojnë edhe të kaluarën e tyre si prestarë të UÇK’së.

Express: PDK ende nuk e ka një qëndrim të qartë për Tribunalin. Ndërkohë janë disa qëndrime të deputetëve se nuk e votojnë kurrë Tribunalin kundër UÇK’së. Për shembull Ganimete Musliu ka thënë se kurrë nuk do ta japë votën për një mekanizëm të tillë?

V. Çitaku: Sigurisht se deputetët e kanë pavarësinë e tyre dhe jo gjithmonë i janë nënshtruar vendimeve të Kryesisë së PDK’së. Ne ende nuk e kemi marrë një vendim si Kryesi rreth votimit që do të jetë në Kuvendin e Kosovës për themelimin e Gjykatës.

Express: Por, deklarimet e disa prej udhëheqësve të PDK’së shkojnë pro themelimit të Tribunalit?

V. Çitaku: Shumica janë të mendimit që votimi në Kuvend do të ishte më pak i dëmshëm se themelimi i një Tribunali nga ana e Këshillit të Sigurimit i Kombeve të Bashkuara. Dhe, në fund fare, kjo nuk do të duhej të shndërrohej në një temë në të cilën dikush do të dëshironte të promovonte vetën ose të tjerët më “patriot” se dikush tjetër. Nuk besoj që ka ndonjë deputet të cilit i dhemb në shpirt më shumë ky proces se sa vetë Kryeministrit të Kosovës dhe Kryetarit të PDK’së për shkak se ai ka qenë udhëheqës politik i UÇK’së. Pra, për mua është e pamoralshme që në këtë pikë të synojmë të promovohemi dhe të përfitojmë poenë politikë. Ndonjëherë, po i dëgjoj disa përfaqësues të subjekteve tjera politike teksa deklarohen rreth Tribunalit dhe e drejtojnë gishtin e fajësisë tek Qeveria e Kosovës, mua më kujtohen takimet bashkë me QUINT’in që kemi pasur me liderët politikë dhe e di shumë mirë çka kanë deklaruar udhëheqësit e subjekteve politike në ato takime. Pra, nuk është mirë që një proces kaq i ndjeshëm dhe njëkohësisht kaq i dhimbshëm të shfrytëzohet si trampolinë politike.

Kosova dy vite monolog për vizat

Express: Cilat janë aktualisht marrëdhëniet me BE’në? Ku jemi me MSA’në dhe liberalizimin e vizave?

V. Çitaku: Përfundimisht, raundi i fundit i negociatave për marrëveshjen e Stabilizim Asociimit do të mbahet më 2 maj dhe përmbyllim negociimin e Marrëveshjen e MSA’së. Kryenegociatori i BE’së do të vijë në Kosovë dhe ne do të mbajmë takimin e fundit me të cilin do të përmbyllet MSA’ja. Dhe, më 5 ose 6 mars, Komisioneri Fule do të qëndrojë në Kosovë për të shënuar edhe solemnisht këtë përmbyllje të negociatave. Pra, MSA’ja ka ecur jashtëzakonisht mirë dhe ka ecur në pajtim me kalendarin të cilin e kemi paraparë. Sa i përket procesit të liberalizimit të vizave në muajin dhjetor e kam pasur një ekip ekspertësh që kanë vlerësuar progresin në bllokun zero dhe një. Gjatë muajit mars e presim grupin tjetër të ekspertëve që ka vlerësuar progresin në bllokun dy dhe tre dhe gjatë muajit maj do të kemi ekipin e fundit vlerësues që do të skanojë progresin në bllokun e katërt.

Express: Qeveria gati sa nuk po konfrontohet me BE’në për vizat. Komisionerja për Çështje të Brendshme e BE’së Malmstrom tha se nuk janë plotësuar kushtet dhe se procesi bazohet në merita ndërkohë që ju dh Kryeministri keni thënë se kushtet janë plotësuar dhe se BE nuk po i dërgon ekipet e saj. Kush po e mashtron opinionin?

V. Çitaku: S’bëhet fjalë për mashtrim. Ne vetëm kemi kërkuar dialog intensiv me Komisionin Europian. Unë po e them me keqardhje, procesi i liberalizimit të vizave më shumë se një dialog mes Kosovës dhe BE’së ka ngjasuar një monologu për më shumë se dy vite. Dy vite e gjysmë bëhet tani që kemi nisur dialogun për liberalizimin e vizave. Ne kemi pasur vetëm një Raport të Progresit nga ana e Komisionit Europianë për liberalizimin e vizave.

Express: Megjithëkëtë, Zonja Lunacek fundosi shpresat për një liberalizim të shpejtë të vizave duke thënë se duhen së paku edhe tre vjet?

V. Çitaku: Është shumë lehtë të nxirren nga konteksti. Është, poshtu, ajo zonja Lunacek bashkë me deputeten Fajon që i dërguan letër Komisionerës Malstrom dhe i kërkuan që të punojë më shumë që Kosovës t’i hiqen vizat. Ne kemi kërkuar nga Komisioni Europian t’i dërgojë ekspertët për të vlerësuar punën që kemi bërë. Kriteret në udhërrëfyes janë shumë të qarta dhe shumë eksplicite. Aty kërkohet miratimi i legjislacionit, kërkohet themelimi i institucione, kërkohen gjëra konkrete dhe të matshme. Kriteret në udhërrëfyes nuk janë abstrakte por janë shumë të matshme. E konfirmoj se secili kriter që është në udhërrëfyes është i përmbushur nga ana e institucioneve të Republikës së Kosovës. Nuk po them vetëm Qeveria i ka plotësuar, sepse Qeveria është vetëm një nga akterët në këtë proces. Është Parlamenti, janë komunat, janë institucionet e pavarura që kanë barrën më të madhe në përmbushjen e kritereve siç është Policia, Prokuroria, janë mediat, është shoqëria civile. Secili që ka pasur hise në gamën e gjerë të kërkesave që i janë adresuar Kosovës janë përmbushur me shumë përkushtim. Këto ditë jam duke i vizituar të gjitha komunat e Kosovës. Kam përmbyllur, pothuajse, ciklin e tretë të vizitave nëpër komuna dhe dua të them se jam e impresionuar me shkallën e përkushtimit të kryetarëve nga të gjitha partitë politike pa asnjë përjashtim.

Express: Në këtë situatë, a guxoni të bëni një premtim se kur do të hiqen vizat pasi më herët ka pasur premtime për datën e liberalizimit?
V. Çitaku: Sikur të varej nga ne do të ishte shumë e lehtë te jepeshin premtime. Ju e dini dhe hyni në arkiva dhe do të gjeni se Kosovës i është premtuar raporti që tani pritet të bëhet në qershor i është premtuar në shtator të vitit të kaluar. Ne na është premtuar raporti për liberalizimin e vizave në shtator të vitit të kaluar. Ne na janë premtuar misionet vlerësuese vitin e kaluar dhe këto po ndodhin vetëm tani. Unë nuk mund të hyjë në zotime të cilat nuk varen nga ne. Por, çdo gjë që është varë nga institucionet e Republikës së Kosovës janë përmbushur. Në këtë pikë dua të falënderoj shumë tërë spektrin politik, partitë opozitare, përfaqësuesit e institucioneve të pavarura që asnjëherë s’kanë hezituar që të përmbushin çdo kërkesë që ka derivuar qoftë nga Plani i Veprimit për MSA’në, qoftë nga udhërrëfyesi për liberalizimin e vizave.

Zgjedhjet mbahen në qershor

Express: Priten zgjedhjet shpejt edhe pse askush nuk e di saktë se kur do të mbahen? Nuk dihet se kush do të jetë Kryeministri i ardhshëm i këtij vendi? A mendoni se dikush tjetër nga skena politike e Kosovës është në gjendje të bëjë dialog me Serbinë, përveç Kryeministrit Thaçi?

V. Çitaku: Thënë të drejtën, mua nuk më pëlqejnë këto lidhjet e fuqishme shpirtërore që ne si shoqëri ballkanike i krijojmë me individë.

Express: A ka individë tjetër që mund të bisedojë me Serbinë?

V. Çitaku: Ajo çfarë ne duhet të punojmë është që të ndërtojmë institucione kredibile. Zgjedhjet e kaluara kanë dëshmuar që ne jemi në gjendje të krijojmë proces elektoral kredibil dhe të pranueshëm qoftë nga spektri politikë këtu, qoftë nga bashkësia ndërkombëtare. E dyta, duhet të ndërtojmë një koalicion funksional. E treta, të zgjedhim një Kryeministër, i cili do t’i përmbahet me përpikëri detyrimeve dhe obligimeve që dalin nga Kushtetuta dhe ligjet e Kosovës. E kemi tejkaluar fazën e fiseve, ku fuqia e përfaqësimit është varë ekskluzivisht nga performansa e kreut të fisit. Me të thënë të drejtën, Kryeministri Thaçi asnjëherë s’e ka synuar atë rol.

Express: Por, po kandidon për herë të tretë për Kryeministër?

V. Çitaku: Po kandidon sepse nuk ka opsion më të mirë në spektrin politik. E as në PDK. Është lider i pakontestueshëm brenda PDK’së. Në rast se ai sërish bëhet Kryeministër, unë besoj se ai do të jetë Kryeministër, me përvojën që ka qoftë në negociatat e mëhershme dhe jo vetëm këto të Brukselit, por thënë të drejtën, ai është lideri me kujtesën më të madhe historike në këto dekadat e fundit. Unë jam e bindur se shumë lehe do t’i bëjë ballë edhe procesit në vijim, proces ky i cili, të jem shumë e sinqertë, është pakrahasimisht më i lehtë se procesi i Rambouillet, se procesi i Vjenës dhe se procesi i cili u kurorëzua me marrëveshjen e 19 prillit.

Express: Ka bërë një marrëveshje Kryeministri me Isa Mustafën ku thuhet se zgjedhjet do të mbahen në pjesën e parë të këtij viti? A do t’i përmbahet PDK marrëveshjes?

V. Çitaku: Po, PDK nuk u është frikësuar zgjedhjeve. Përkundrazi, ne kemi qenë të vendosur që data e zgjedhjeve të reflektojë një lloj konsensusi të brendshëm në aspektin politikë në Kosovë. Ne jemi të gatshëm për zgjedhje dhe besoj se kjo është shumë evidente. Jam e bindur se edhe Kryetari i PDK’së dhe Kryetari Mustafa do t’i përmbahen një marrëveshje në parim se nuk ka qenë një marrëveshje e shkruar.

Express: A do të shpërbëhet Kuvendi gjatë prillit në mënyrë që zgjedhjet të mbahen në qershor?

V. Çitaku: Janë afatet kushtetuese që e diktojnë edhe kohën se kur duhet të shpërbëhet Kuvendi. Në rast se ne synojmë që zgjedhjet të mbahen në pjesë e parë të muajit qershor, Kuvendi gjithsesi duhet të shpërbehet brenda muajit prill.

Express: Keni thënë disa vjet me parë se koalicioni i PDK’së me LDK’në ka qenë një martesë për interes. Nëse vjen puna do të bëjë PDK edhe një martesë të këtillë me LDK’në?

V. Çitaku: PDK ka dëshmuar tashmë disa herë që kur janë në pyetje interesat e qytetarëve të Republikës së Kosovës, kur janë në pyetje interesat më madhore është në gjendje të tejkaloj vetveten dhe të bëjë partneritet me subjektet politike. Këtë e kemi dëshmuar jo vetëm përmes koalicionit të mëhershëm me LDK’në. Këtë e kemi dëshmuar edhe me konstruktivitetin që kemi treguar gjatë kohës sa kemi qenë në opozitë që kemi marrë pjesë aktivisht në procesin e Vjenës… Ne nuk kemi një parti të preferuar, të themi kushtimisht, për të ndërtuar koalicionin e ardhshëm qeveritar, sikurse nuk kemi ndonjë subjekt politik, të cilin e kemi përjashtuar tërësisht nga ky proces.

Express: LDK dhe AAK po thonë se refuzojnë të bëjnë koalicion me ju, Vetëvendosje dihet çfarë qëndrimi ka?

V. Çitaku: Nuk mund të flas për partitë tjera. Ata sigurisht se do t’i marrin qëndrimet e tyre karshi edhe rezultatit zgjedhor, edhe interesave të tyre partiake, edhe prirjeve të tyre ideologjike. Mirëpo, PDK do ta përzgjedh partnerin e koalicionit në atë mënyrë që të krijohet një qeverisje stabile, një koalicion funksional dhe një sistem përmes të cilit do të mund të qonim përpara një agjendë kërkuese për përmbushjen e reformave në procesin e integrimeve në BE, qoftë karshi zhvillimit të ekonomisë dhe krijimit të vendeve të lira të punës që nga Kryeministri Thaçi janë identifikuar si prioritetet kryesore në qeverisjen e ardhshme.

Nuk më dolën lotët kur Jakupi iku nga PDK’ja

Express: Njeriu që kishte lobuar që Bechtel&Enka ta fitojë kontratën për autostradën Ambasadori Dell, është punësuar në këtë kompani. Kjo u interpretua si konflikt interesi? Duket se ambasadori e paska pasur edhe interesin e tij personal kur është angazhuar, kur ka lobuar për këtë kompani?

V. Çitaku: Punësimi i Ambasadorit Dell në Bechtel&Enka nuk është çështje me të cilën duhet marrë Qeveria e Kosovës. E dyta, SHBA’të kanë rregullat e tyre mbi bazën e të cilave ish-diplomatët kanë të drejtë që të punësohen në kompanitë private pas pensionimit. Unë e mbaj mend Ambasadorin Jock Kovi i cili ka qenë Zëvendësshef i Misionit të UNMIK’ut në Kosovë. Pas shumë vitesh e kam takuar këtu si anëtar i Bordit të Kompanisë Bechtel&Enka. Pra, nuk është bërë asgjë e jashtëzakonshme me punësimin e Ambasadorit Dell. Unë s’kam parë diçka të tillë kur dihet se i tërë procesi i ndërtimit të autostradës së kombit ka qenë transparent prej hapjes së ofertave që është bërë në mënyrë publike.

Express: Në shënimin e 15 vjetorit të largimit të shqiptarëve nga Kosovë që u mbajt në Kukës u patë duke iu dalë lotët. Dikush këtë e interpretoi se lotët e juaj dolën për shkak të keqqeverisjes dhe gjendjes në të cilën jemi tani…

V. Çitaku: Ne jemi njerëz dhe unë kam qenë refugjate. Teksa i shihja pamjet atje m’u kujtua vetja dhe motrat e mija kur jemi ndarë nga prindërit pasi jemi dëbuar nga shtëpia jonë. Edhe atë ditë më ka bërë të shoh dy anë shumë ekstreme të fytyrës së njeriut. Lufta e shfaq më të keqen, por edhe vë në pah më të mirën tek njerëzit. Jo, më larg se njëqind metra në vijën kufitare në Glloboçicë, ku jam deportuar unë me motrat e mija, njërën anë kanë qenë forcat e ushtrisë dhe policisë serbe që na kanë dëbuar. Në anën tjetër, ka qenë një mal me njerëz – shqiptarë nga Maqedonia – që kishin dalë me na prit për të na strehuar në shtëpitë e tyre. Kjo më është kujtuar…

Express: Me siguri se lotët nuk të kanë dalë kur e ke marrë lajmin për largimin e Jakup Krasniqit nga PDK’ja?

V. Çitaku: Me të thënë të drejtën, jo, mirëpo, ata që më njohin e dinë që emocionohem dhe di të qaj nëse e shoh një film të mirë ose dëgjoj një këngë të mirë.

Express: Tashmë, Jakup Krasniqi ua ka lëshuar rrugën për të kryer punë. Po të citoj bisedën tuaj në aferën e përgjimeve, ku thua se “sa ta kemi Jakupin kemi me pas vështirë për të kryer punë”?

V. Çitaku: Relacioni mes dy individëve edhe në këtë rast, relacioni mes meje dhe z. Krasniqi, nuk mund të definohet në bazë të një sekuence. Jam e bindur se edhe ju keni momente kur me më të afërmit keni momente shpërthimi. Kam pasur dhe kam raport shumë korrekt me z. Krasniqi. Ka qenë zgjedhje e tij që të largohet nga PDK’ja dhe i dëshiroj fat.

Express: Sa është e mundshme që “Nisma për Kosovën” ta dërgojë PDK’në në opozitë?
V. Çitaku: Jo. Këtu nuk kam fije dyshimi. Jam e bindur se PDK do të dalë e para në zgjedhjet parlamentare. Këtë nuk po e bazoj veç në sondazhet e shumta që kanë qarkulluar ditëve të fundit, mirëpo, e bazoj në faktet e drejtpërdrejta që kam me qytetarët e Republikës së Kosovës.