Çitaku: S’na duhet liberalizmi në një shtet talibanesk!

Prishtinë – Ministrja Vlora Çitaku i është kundërpërgjigjur hoxhë Shefqet Krasniqit, i cili i ka sugjeruar asaj që të merret me punët e saj e jo më hoxhallarët.

Deklaratat e Krasniqit vijnë pasi që Çitaku kundërshtoi fort deklaratat e hoxhë Irfan Salihut në lidhje me “moralin” e femrave shqiptare.

Ministrja e Integrimeve Europiane tha se do të merret me punët e saj, por i kujtoi Krasniqit se liberalizimi s’ka asnjë kuptim nëse vendi shndërrohet në një “shtet talibenesk”.

“Pikë së pari, agjenda Europiane dhe konteksti kulturor e politik nuk janë kontekste të shkëputura, por ndërveprojnë njëra me tjetrën. As njëra e as tjetra nuk mund të përmbushen/ndërtohen/shkatërrohen vetëm nga një individ! E dyta, ata që më thonë merru me viza e këqyri punët tua u them: Po, me viza po merrem dhe do të merrem. Po asgjë nuk na duhen vizat në një shtet talibanesk! Dhe mos më thoni tani ju luftojeni krimin e korrupsionin se ato janë rreziku i vërtetë, sepse pajtohem plotësisht! Po prania e korrupsionit nuk e amniston fundamentalizmin! Unë kam me i luftu të dyjat!”, ka shkruar Çitaku në rrjetin sociali, Facebook.

Hoxhë Shefqet Krasniqi, mbrëmë në emisionin “Rruga e ndriçuar” ka folur lidhur me ligjëratën e hoxhë Irfan Salihut, transmetuan mediet.

“Personi i parë që ka reaguar lidhur me ligjëratën e hoxhë Irfanit, është ministresha e cila kurrë asgjë s’ka bërë për Ministrinë e vet. Hiç hiç kurrë”, është shprehur Krasniqi, duke iu referuar reagimit të ministres së Integrimeve Evropiane, Vlora Çitakut.

“Edhe 1 muaj bëhet liberalizimi i vizave, edhe 2 muaj, edhe 1 vit. Jo zonjë liberalizimi i vizave për ty ndoshta është bërë, por për ne jo”, është shprehur ai.

“Zojë më mirë këqyri punët e tua”, i është drejtuar Krasniqi ministres Çitaku. Ndërsa sa i përket reagimit të djeshëm të tri deputeteve, Alma Lama, Teuta Sahatçija dhe Blerta Deliu, Krasniqi, siç raporton infoglobi, është shprehur se ishin këto deputete ato që dy vjet më parë “na e nxinë Bajramin”. “Ju me dorën tuaj votuat kundër mbulesave, na e keni nxirë Bajramin. Mos mendoni se ne harrojmë, Jo, jo zonja nuk harrojmë” është shprehur ai.

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).