Çitaku: Kurti me lehtësi shpallte tradhtarë e kriminelë, shpresoj ta ketë kuptuar rëndësinë e dialogut tani

Nënkryetarja e PDK’së, Vlora Çitaku, thotë se kryeministri Albin Kurti ka ndryshuar qëndrim sa i përket dialogut me Serbinë. Çitaku thotë se është e rëndësishme që i pari i ekzekutivit të Kosovës, të kuptoj se Serbia nuk bindet, dhe se qëllimi i vendit tonë duhet të jetë bindja e bashkësisë ndërkombëtare.

Çitaku në emisionin DPT te Fidani në T7, tha se Kurti duhet të tregojë se çka diskutoi në Berlin gjatë darkës me presidentin e Serbisë, Aleksandar Vuçiq.

“Unë mendoj se (Kurti) ka ndryshuar qëndrim, i ka kuptuar limitet e qeverisjes, e ka kuptuar se dialogu është i rëndësishëm dhe i pashmangshëm”, tha Çitaku.

Ajo nuk e quan Kurtin ‘tradhtar’.

“Për një kohë shumë të gjatë qytetari i Kosovës është terrorizuar nga eksponentë të ndryshëm politik në Kosovë. Me një lehtësi të padurueshme janë thanë fjalë shumë të rënda dhe të mëdha, njerëzit janë shpallur tradhtar, kriminelë. Unë nuk besoj se Kurti është tradhtar, unë shpresoj ta ketë kuptuar se dialogu është i rëndësishëm, shpresoj që nga pozicioni ku është sot të ketë edhe një kuptim tjetër për procesin në të cilin kemi kaluar në vitet e fundit. Shpresoj ta ketë kuptuar se dialogu është një instrument, jo qëllim në vetvete”, shtoi ajo.