Chievo gëzon Hetemajn

Përparim Hetemaj, përgjithmonë në Chievo. Mesfushori kosovar e ka vazhduar kontratën me ekipin nga Verona për katër vjet.

Përfaqësuesi finlandez hoqi dorë kështu nga mundësia për t’u transferuar në Genoa.

Ai kishte kontratë edhe një vit, ndërsa tash do të jetë i verdhekaltërve deri në vitin 2019.

“Kishte një mundësi e ndërrimit të mjedisit, por jam i kënaqur për marrëveshjen për vazhdimin e kontratës”, deklaroi Hetemaj për mediat italiane.

“Ekziston gjithmonë rreziku kur luan në sezonin e fundit të kontratës. Prandaj, vazhdimi i saj është opsioni më i mirë”, vazhdoi Hetemaj.

Ai është zotuar se do ta japë maksimumin për ekipin e tij, duke e ndihmuar në arritjen e objektivave. Për të nuk ka rëndësi se në cilën pozitë luan, por e preferon krahun e majtë të mesfushës.