Challandes: Harroni “tiki takën”

Kosova do të debutojë të hënën në eliminatoret e Euro 2020-ës, me sfidën që do të zhvillohet në orën 20:45 në stadiumin “Fadil Vokrri” në Prishtinë.

Tekniku i “Dardanëve”, Bernard Challandes, doli në konferencën e zakonshme për shtyp, ku foli për momentin e mirë që po kalojnë të besuarit e tij, ndërsa bëri thirrje për përqendrim maksimal, duke kujtuar se ky takim ka vlerë 3-pikëshe.

“Kemi pasur një ndeshje më shumë për të përgatitur këtë takim dhe një miqësore mjaft interesante para 3 ditësh, por nuk mund të them gjë për Bullgarinë”, tha Challandes.

“Për momentin nuk kemi telashe dhe ekipi është në një situatë të mirë”.

“Bullgaria është një ekip mjaft kompakt dhe jam i bindur që do të bëjnë një ndeshje mjaft të mirë ndaj nesh”.

“Nëse do të tentojmë të luajmë pak me stilin “tiki taka”, si ndaj Danimarkës, atëherë do të jetë mirë për ju tifozët, por aspak mirë për skuadrën, pasi do të na komplikonte punën”, shtoi ai mes tjerash. /Gazeta Express/