Challandes flet për shortin e ‘Euro 2020’: “Grupi C, short i mirë”

Trajneri i Përfaqësueses së Kosovës, Bernard Challandes ka folur pas hedhjes së shortit, ku u mësuan gjashtë grupet e Euro 2020.

Challandes tha se ndihet i lumtur me shortin dhe beson se Kosova ka mundësi reale për t’u kualifikuar.

“Ne tashmë e dimë zgjedhjen e parë, grupi C ku gjendet Holanda, Austria dhe Ukraina. Është një zgjedhje e mirë për ne dhe e duam”, ka thënë fillimisht Challandes pas lidhjes telefonike me SS Kosova.

E opsionin e dytë e sheh më të vështirë.

“Opsioni i dyti është grupi F, por ky është më i vështirë për ne, pasi gjenden Gjermania, Portugalia dhe Franca. Unë mund t’i pranoj të gjitha grupet, vetëm të kualifikohemi. Për mua nuk është problem kjo gjë”, u shpreh Challandes.

“Është shumë e vështirë për ne, por kemi mundësi reale në mars në Ligën e Kombeve. Shpresojmë se do t’i kemi të gjithë lojtarët në dispozicion dhe të arrijmë kualifikimin në Euro 2020”, ka përfunduar trajneri i Kosovës.