Challandes e fiton edhe një futbollist të ri në ekipin kombëtar të Kosovës

Trajneri Bernard Challandes e ka ftuar futbollistin e Luzernit, Shkëlqim Demhasajn në ekipin kombëtar të Kosovës për ndeshjet e nëntorit.

Lëndimi i Bersant Celinës e ka shtyrë Challandesin ta ftojë Demhasajn, i cili do t’i bashkohet skuadrës të martën në mëngjes, raporton Gazeta Express.

“Pas lëndimit të Bersant Celinës në ndeshjen e së shtunës në skuadrën e tij, përzgjedhësi Bernard Challandes e ka ftuar në grumbullim Shkëlqim Demhasajn për dy ndeshjet e ardhshme kundër Maltës dhe Azerbajxhanit”, ka thënë Federata e Futbollist e Kosovës në një njoftim.

“Futbollisti i Luzernit do t’i bashkohet ekipit kombëtar nesër në mëngjes”, thuhet në njoftim.

Kosova do të luajë kundër Maltës në udhëtim të shtunën më 17 nëntor dhe ndaj Azerbajxhanit të martën më 20 nëntor në Prishtinë në Ligën e Kombeve.

Kosova është lidere e Grupit 3 të Ligës D me 8 pikë, dy më shumë se Azerbajxhani në vendin e dytë dhe synon ta fitojë grupin në përpjekje për t’u kualifikuar në Kampionatin Evropian 2020 përmes një rruge më të lehtë./Express/