Çfarë ndeshje, çfarë spektakli – Kosova me epërsi të dyfishtë ndaj Suedisë pas pjesës së parë

Kombëtarja e Kosovës po fiton me rezultat 2-0 pas pjesës së parë në ndeshjen ndaj Suedisë, e cila po zhvillohet në stadiumin ‘Fadil Vokrri’.

Kjo ndeshje i takon ciklit kualifikues për Kupën e Botës 2026 dhe ‘Dardanët’ po zhvillojnë një ndeshje spektakolare.

Që nga minuta e parë Kosova dëshmoi karakter të fortë duke treguar një rezistencë të madhe në fazën defanzive si dhe duke rrezikuar në çdo dalje të mundshme në fazën e sulmit.

Golin e epërsisë Kosova e gjeti në minutën e 13-të me anë të Elvis Rexhbecaj i cili realizoi për rezultatin 1-0 në një situatë një për një me portierin Robin Olsen.

Të besuarit e Franco Fodës nuk u zmbrapsën pas golit të epërsisë dhe vazhduan me sulmet në drejtim të portës suedeze.

Po luhej minuta e 40-të e takimit kur pas një kundërsulmi vrasës, Kosova e gjeti edhe golin e dytë.

Ishte Vedat Muriqi i cili realizoi një super gol për 2-0 pas një kombinimi fantastik me Albion Rrahmanin i cili ishte në rolin e asistuesit.

Mbetet të shihet se si do të rrjedhë pjesa e dytë, por Kosova tani e ka shumë më të lehtë menaxhimin e epërsisë./Telegrafi/