Çfarë biseduan krerët e shtetit me ambasadorin amerikan? Presidenti zbulon detaje nga takimi

Presidenti i Kosovës, Hashim Thaçi, ka zbuluar detaje nga takimi që ai, bashkë me krerët e tjerë të institucioneve të vendit, kanë zhvilluar me ambasadorin e Shteteve të Bashkuara të Amerikës në Prishtinë, Philip S. Kosnett.
“Sot, në prezencë të ambasadorit amerikan në Kosovë, Philip S. Kosnett, kam zhvilluar takime të përbashkëta me liderët institucionalë, me kryeparlamentarin Kadri Veseli, kryeministrin Ramush Haradinaj dhe zëvendëskryeministrat Fatmir Limaj e Behgjet Pacolli”, ka shkruar Thaçi, në llogarinë e tij zyrtare, në rrjetin social Facebook, në internet.

“Në këto takime kemi biseduar për çështje të rëndësishme shtetërore, për ruajtjen e partneritetit të përjetshëm me SHBA-në dhe për procesin e dialogut Kosovë-Serbi”, ka thënë Thaçi.

“Interesi shtetëror duhet të bëjë bashkë gjithë spektrin politik, për të marrë vendime të rëndësishme për perspektivën e qytetarëve dhe për të ardhmen tonë euroatlantike, në përputhje me interesat e SHBA-së dhe partnerëve strategjikë të Kosovës”, ka deklaruar presidenti kosovar.

“Prandaj, në ditët në vijim, pres vendimmarrje të përgjegjshme në përputhje të plotë me interesat shtetërore”, ka shtuar Thaçi.

“Nuk kemi kohë për të humbur”, ka porositur presidenti i Kosovës./express/