Çështja e targave, Tahiri i PDK-së: Veprimet e Qeverisë duhet të jenë në koordinim me SHBA-të

Shefi i Grupit Parlamentar të Partisë Demokratike të Kosovës (PDK), Abelard Tahiri ka folur të martën për çështjen e targave.

Tahiri pas mbledhjes së Kryesisë në Kuvendin e Kosovës në një konferencë për media tha se çfarëdo veprimi që ndërmerr Qeveria e Kosovës e që respekton sovranitetin e vendit në gjithë territorin do ta ketë përkrahjen e PDK-së.

Sipas tij, veprimet e Qeverisë së Kosovës duhet të jenë në koordinim me Shtetet e Bashkuara të Amerikës (SHBA), përcjell Telegrafi.

“Mendoj që secili veprim i Qeverisë së Kosovës që do të ndërmerret në raport me Serbinë pa dyshim që është shumë i rëndësishëm që të koordinohet me Shtetet e Bashkuara të Amerikës. Mirëpo mbi të gjitha më e rëndësishmja është që koordinimi të rezultojë me respektimin e sovranitetit të Republikës së Kosovës. Nuk mund të lejohet në pafundësi shfrytëzimi i targave të tilla. Besoj që çfarëdo veprimi që ndërmerr Republika e Kosovës, e që respekton sovranitetin e vendit tonë dhe në atë pjesë të Kosovës pa dyshim që ka përkrahje të PDK-së”, ka thënë Tahiri.

Ndërsa, kryeministri i vendit Albin Kurti në një prononcim për media pasi mori pjesë në Samitin rajonal për sigurinë, ekonominë dhe paqen në vendet e Ballkanit Perëndimor, që po mbahet në Prishtinë, konfirmoi se nuk do të ketë shtyrje të afatit për targat.

“Ne tashmë e kemi bërë një shtyrje të afatit më 31 korrik e kemi shtyrë afatin për një muaj, dhe në vend se të jetë data 1 tetor është data 1 nëntor. Të gjithë qytetarët e Kosovës që kanë automjetet me targa të kohës së Millosheviqit, do të mund t’i konvertojnë ato në targa legale e legjitime RKS”, ka thënë Kurti para gazetarëve, raporton Telegrafi.

Ndërkaq, edhe disa ditë kanë mbetur nga kalimi i afatit kohor për konvertimin e targave, nga ato ilegale në RKS.

Ndryshe, seanca e re plenare e Kuvendit të Kosovës do të mbahet të enjten, 27 tetor. /Telegrafi/