Celina i gatshëm të punojë me Guardiola-n

Bersant Celina është i entuziazmuar që do të punojë me një trajner të madh, siç është Pep Guardiola.

Spanjolli do të drejtojë Manchester City-n edicionin e ardhshëm dhe futbollisti nga Kosova, ndihet i nderuar që do të punojë me të. “Ne të gjithë e dimë sesi luan ai, merre topin shpejt dhe mbaje. Është e ngjashme siç luajmë tani, por do të shohim vitin e ardhshëm. Ne kemi shumë liri me topin, por është e dukshme që ai ka shumë taktika. Loja defensive dhe presingu, janë njëra nga këto”, deklaroi Celina për “Daily Mail”.

Celina gjithashtu falënderon Manuel Pellegrini-n, pasi e ka ndihmuar shumë, derisa nuk frikësohet nga konkurrenca, pasi City po kërkon futbollistë të nivelit të lartë si Paul Pogba e Ilkay Gundogan.

Ai shpreson që të vazhdojë kontratën dhe t’i jepet mundësia për të impresionuar trajnerin e tij gjatë përgatitjeve për edicionin e ardhshëm.

Falënderon Pellegrini-n

Mesfushori i cili luan për Kosovën edhe pse u rrit në Norvegji, nuk mund të flet keq për Pellegrini-n. “Pellegrini më ka ndihmuar shumë. Ai është njëri ndër ata që më dhanë mundësinë në një klub të madh. I jam shumë falënderues që më ka dhënë mundësinë dhe ende më jep. Është e vështirë, por të gjithë lojtarët e rinj kemi luajtur në ekipin e parë. Njerëzit thonë se nuk është e mundur, por aktualisht është e mundur. Nëse je shumë i mirë dhe i pëlqen trajnerit, atëherë ju mund të ndihmoni skuadrën. Kjo është e mundur. Ka shumë lojtarë të rinj që kanë luajtur dhe besoj se kjo do të vazhdojë”, theksoi futbollisti i Përfaqësues së Kosovës.

Ai është në Mançester që katër vjet, jeton me të dashurën në një banesë në qendër të qytetit, derisa i pëlqen edhe muzika, ku 50 Cent, është i preferuari i tij. Ai pret një konkurrencë të madhe edicionin e ardhshëm. “Do të jem në ekipin e parë në përgatitjet për edicionin e ardhshëm dhe menaxheri i ardhshëm mund të më shikoj për aftësitë që kam. Nëse i nevojitem ose dëshiron që unë të qëndrojë, atëherë jam i gatshëm. Nëse jo, atëherë gjëja më e mirë do të ishte huazimi dhe të luaj në ekipin e parë. Jam i lumtur të luaj kudo, por në një ligë të fortë. Vendosa me menaxherin të qëndrojë këtu në janar. Për mua, kjo ishte gjëja më e mirë për mua deri më tani. Kam debutuar dhe kam katër ndeshje deri më tani dhe shpresoj se do të ketë edhe ndeshje tjera. Sigurisht se nuk pres që edicionin e ardhshëm të luaj në çdo ndeshje, megjithatë nëse i nevojitem trajnerit, atëherë jam i gatshëm të qëndroj”, përfundoi Bersant Celina. (Kosova Sot)