Çeku i fton serbët të bëhen ushtarë të Kosovës

Nga dita e sotme FSK-së i janë bashkuar edhe 30 pjesëtarë të rinj të komuniteteve, pasi që me sukses kanë përfunduar Kursin e Trajnimit Bazik. Në ceremoninë e certifikimit të rekrutëve, të cilët përbëjnë gjeneratën e parë për vitin 2013, e që u zhvillua në Komandën e Doktrinës dhe Stërvitjes të FSK-së, në Ferizaj, morën pjesë ministra, ushtarakë dhe ambasadorë të vendeve të Quintit.

Me këtë rast, komandanti i FSK-së gjeneral-lejtnant, Kadri Kastrati, ka thënë se kjo ditë është e veçantë pasi të diplomuarit vijnë nga radhët e komuniteteve dhe kjo, sipas tij, shënon një hap tjetër drejt zhvillimit të kësaj force.

“Kjo është një ditë e veçantë për të gjithë ne, pasi jemi dëshmitarë të diplomimit nga Trajnimi Bazik, i cili shënon edhe një hap drejt zhvillimit të FSK-së. Ajo çfarë e bën këtë ditë më të veçantë është fakti që të diplomuarit e sotëm vijnë nga radhët e komuniteteve të ndryshme etnike në Kosovë. Të nderuar ushtarak të diplomuar, sot do të doja të ju drejtohem juve në veçanti, komandantët dhe instruktorët e juaj më kanë treguar sa shumë keni studiuar, sa të motivuar ishit dhe sa mirë keni performuar gjatë procesit të trajnimit”, ka pohuar ai, transmeton Kospvapress.

Edhe ministri i FSK-së, Agim Çeku ka vlerësuar se FSK-ja çdo ditë e më shumë po fiton besueshmërinë e të gjithë qytetarëve të vendit. Ndërsa, shtoi se nga sot FSK-ja është edhe më shumë multietnike.

Ministri Çeku, ju ka drejtuar të porsa diplomuarve, duke thënë se të njëjtit ndryshuan perceptimet e gabuara dhe thyen barrierat e vjetra, duke hapur rrugën edhe për bashkëkombësit e tyre që një ditë të bëhen ushtarë të Kosovës.

“Ju nga sot po bëheni më të vlefshëm, jo vetëm për vete dhe familjen tuaj, por edhe për Kosovën dhe komunitetin e juaj. Ju me vendimin për t’ju bashkuar FSK-së i ndryshuat shumë perceptimet e gabuara, i thyet shumë barriera të vjetra dhe hapet rrugën që edhe bashkëkombësit tuaj të bëhen ushtarë të Kosovës”, ka pohuar ai.

26 nga të diplomuarit e sotëm vijnë nga komuniteti serb, dy nga ai boshnjak dhe nga një nga komuniteti turk dhe ashkali.

Ushtarakët e rinj u shprehen të ngazëllyer, pasi që më në fund u realizua një ëndërr e kamotshme e tyre.

Pjesëtari i komunitetit serb, Aleksandër Denic, diplomimin e sotëm e cilësoi si shumë domethënës për karrierën e tij. Ai ka thënë se në të ardhmen shpreson të jetë një ushtarak i suksesshëm.

“Ky është një sukses për mua dhe mendoj se gjatë karrierës sime do të arrij t’i përmbush ato kritere që janë të parapara dhe që më takojnë. E dua ushtrinë dhe kjo më ka shtyrë që të jem pjesëtar i FSK-së”, ka pohuar ai.

Pjesëtari tjetër nga komuniteti boshnjak, Amir Halilovic, ka pohuar se trajnimi ka shkuar shumë mirë dhe se shprehet i vendosur që shtetin në të cilin e konsideron të tij, ta mbrojë deri në vdekje.

“Jam këtu që 9 javë, trajnimi ka qenë shumë i mirë, ka shkuar shumë në rregull dhe ka qenë shumë profesional. Unë e dua shtetin tim dhe do t’i dal zot deri sa të jam gjallë”, ka pohuar ai.

Zv. ambasadorja e SHBA-ve, Kelly Degnan, ka përshëndetur vendimin e komuniteteve për t’ju bashkuar FSK-së, duke thënë se SHBA-të admirojnë vendimet e tilla, edhe pse, siç thekson ajo, nganjëherë nuk janë të lehta.

Ajo ka potencuar edhe njëherë se SHBA-të janë të përkushtuar të ndërtojnë një shtet multietnik dhe demokratik, ndërsa, pjesëtarët që sot i’u bashkuan FSK-së i ka quajtur ardhmëria e Kosovës.

Në ceremoni kanë marrë pjese edhe gjeneral brigade Salvatore Karta, zëvendës komandant i KFOR-it dhe Shef i Divizionit Këshillues Ushtarako-Civil të NATO-s dhe Ekipit Ndërlidhës Këshillues të NATO-s(MCAD/NLAT) për FSK-në. Kryetarët e komunave me shumicë nga radhët e minoriteteve, ambasadorët e QUINT-it, zëvendës komandanti i FSK-së gjeneralmajor Rrahman Rama, atasheu ushtarak i SHBA-ve James Kott, stafi i lartë i FSK-së, KFOR-it, NAT-it, dhe familjarët e rekrutëve. /Telegrafi/