Cana nuk dorëzohet

Lorik Cana mendon se Kombëtarja shqiptare ende ka shpresa për t’u kualifikuar në fazën tjetër të Kampionatit Evropian nëse mposhtin Rumaninë. Katër skuadra më të mira të vendit të tretë në Grupe, do të kualifikohen në fazën tjetër të Euro 2016.

Në një intervistë për Top Channel, kapiteni i Kombëtares shqiptare, Lorik Cana, ka thënë se lojtarët do të japin gjithçka në fushë ndaj Rumanisë për të marrë fitoren e parë dhe historike.

Ai shpreson se kuqezinjtë do të jenë në mesin e atyre katër skuadrave që sigurojnë biletën nga vendi i tretë, por që fillimisht duhet ta mposhtin Rumaninë e pastaj të shpresojnë se do të jenë të mirë me statistika.

“Akoma kemi gjasa për të kaluar më tej. Me Rumaninë na duhet vetëm fitorja, nëse kemi pak fat edhe me vendin e tretë do të kualifikohemi”, deklaroi Cana.

Kujtojmë se kapiteni i Kombëtares nuk luajti ndaj Francës për shkak të kartonit të kuq që mori në ndeshjen debutuese ndaj Zvicrës, por do të jetë i gatshëm për sfidën e fundit.