Cana ia propozon tre lojtarë Lazios, dy janë shqiptarë

Kapiteni i Kombëtares Shqiptare, Lorik Cana, i ka sugjeruar ish skuadrës së tij, Lazios, që t’i sjell në radhët e veta tre lojtarë, në mesin e tyre dy shqiptarë.

Duke folur për ‘Radiosei’, Cana që do të jetë me Shqipërinë në Euro 2016, i ka propozuar Lazios talentin Milot Rashicën, mbrojtësin Arlind Ajetit dhe francezin Ben Arfa.
“Rashica kohëve të fundit i është bashkuar Kombëtares. Ai ka cilësi të pabesueshme, është shumë i lëvizshëm dhe dinamik. Por patjetër që atij i duhet të përmirësohet, por e ka të ardhmen e sigurt. Për Ajetin mund të flas veç mirë, ai pati vështirësi në fillim të Frosinone, por pastaj ka pasur mundësi tregoj veten. Ai ka luajtur shumë mirë në ekipin kombëtar. Ben Arfa? Unë kam qenë kapiten i tij. E njoh personalisht. Është njëri nga lojtarët më të fortë që kam parë ndonjëherë, kur ai është në formë, atë nuk mund ta ndalësh. Ka cilësi të luaj në cilido klub në botë”, ka deklaruar Cana.

Cana ka qenë pjesë e Lazios për katër sezone, ndërsa në vitin 2013 arriti suksesin më të madh duke fituar Kupën e Italisë./Indeksonline/