Cana: Do të jem tifozi numër 1 i Kombëtares

Kapiteni i Kombëtares shqiptare Lorik Cana nuk do të mund ta japë kontributin e tij ndaj Norvegjisë për arsye të pezullimit, por gjithsesi ai do t’i mbështesë maksimalisht shokët e skuadrës sikurse të gjithë tifozët e tjerë në shkallët e stadiumit.

Mbrojtësi i Lazios ishte në rezidencën e përfaqësueses në Durrës, nga ku theksoi për “Sport News” se do të vuajë shumë faktin që nuk do të jetë në fushë.

Përtej pritshmërive të mëdha për këtë sfidë, Cana u bën thirrje futbollistëve kuqezi që të ruajnë qetësinë dhe të shfrytëzojnë mbështetjen e zjarrtë të publikut në “Qemal Stafa”.

Sikurse trajneri Gianni De Biazi, edhe kapiteni Cana nuk e sheh si përcaktuese përballjen me Norvegjinë, edhe pse një fitore e mundshme do t’ii rriste shanset për kualifikim.

Cana komentoi edhe prurjet e reja në kombëtare, duke qenë i bindur se në 10 vitet e ardhshme do të rriten pretendimet për kualifikim në eventet e rëndësishme.