Caktohet masa e paraburgimit dhe arrestit shtëpiak ndaj të dy pandehurve që shantazhuan doktor Elez Elezin

Gjilan – Gjykata Themelore në Gjilan ka aprovuar kërkesën e Prokurorisë Themelore të Gjilanit, duke i caktuar masën e paraburgimit prej 30 (tridhjetë) ditësh të pandehurit Metali Kurtalani, ndërkohë ka refuzuar kërkesën për caktim të paraburgimit për të pandehurën Fatmire Kurtalani, duke i caktuar masën e arrestit shtëpiak prej 30 (tridhjetë) ditësh. Të pandehurit dyshohet se me qëllim të përfitimit të kundërligjshëm pasuror për vete, e kanë kanosur të dëmtuarin Elez Elezin., se nëse nuk u jep i njëjti të holla në shumën prej 5.000 Euro, ata do të zbulojnë një videoinqizim i cili do të dëmtonte nderin dhe autoritetin e tij.

Me këto veprime të pandehurit kanë kryer veprën penale “shantazh”.
Gjyqtari i procedurës paraprake konstatoi se janë përmbushur kushtet ligjore për caktimin e masës së paraburgimit për të pandehurin Metali Kurtalani, ndërsa për të pandehurën Fatmire Kurtalani masa e arrestit shtëpiak.

Palët kanë të drejtën e ankesës ndaj këtij vendimi në Gjykatën e Apelit./rajonipress/