Çaji i Rusit dhe rakia
RajoniPress
18:56, 19 Maj, 2015
Kur ishte Jugosllavia –N’ kamë u çuen shqiptaria, Anë e mbanë nëpër shtëpia, Hyni çaji edhe rakia !…
Komunistët, do faqezi –
Zunë me shkije dosllaki !
Zunë po i merrnin nëpër shtëpi –
Bashkë me ta pinin raki !…
Zunë me shkije çonin jerdam –
Për raki blinin takam !
S’ kishin bukë me hëngër fëmija ,
Por aty vlonte rakia !
Kështu bënin ca komunistë –
Sollën n’ shpi zakon të pistë !
Zunë me shkije kumbari ,
Pobratima e dostllaki !…
Kriste n’ derë kuma Jovan –
Hajde brate , dobar dan !
Hajde vëlla , brenda me hi –
Ta pimë bashkë na ‘i gotë raki !
Gratë – kumbarën unët s’ e lenin ,
Ia shtronin sofrën bukë të ngrënin :
“Ha , n’ kofsh turk , aga Jovan ,
Me u çue unët ti, hiq nuk banë “!
“N’ kofsha turk , kumja Kumri –
N’ shpi të juve , unët nuk rri !
Si n’ shpi teme ha e pi ,
Si n’ shpi teme pi raki “!…
Këqyr çka banë shkijet e Serbisë –
Me shqiptarë i hynë tregtisë !
Sillnin çajin prej Indisë –
Dhe ua shisnin për “Çaj t’ Rusisë!”
N’ t’ gjitha fshatrat e malësisë –
Shitej “çaji i Rusisë “?!
Për me ditë se na mori pusi –
Të gjithë pinin veç “çaj Rusi!”
Shpi për shpi e odë me odë –
“Çaji i Rusit” hyni n’ modë !
Bënin gara në çdo anë –
Kush po e pi çajin ma t’ ranë ?!
Bënin gara nëpër terr –
Kush po e pi çajin pa sheqer ?!
Bënin garë burrat karshi –
Kush po e pi çajin ma t’ zi ?!
Bënin gara me zullum –
Kush po pi çaja ma shumë ?!
I lanë kafe , lanë llokum –
Der’ n’ sabah rrinin pa gjumë !
Kështu shumë burra t’ shqiptarisë ,
Helm të zi i dhanë mushkërisë –
Soll me i hy n’ hatër Serbisë ,
Soll me i hy n’ hatër Rusisë !…
Shumë do burra nga këto male –
Përfundonin nëpër spitale !
Shumë shtëpive iu pat hy fika –
Taraçive iu binte pika !…
Gjilan, më 19.05.2015 . Demir Krasniqi
