Buzhala: Haradinaj po ia huq

“Këto i shoh si përpjekje dëshpëruese të z. Haradinaj për t’i riparuar dëmet e shkaktuara prej vetë atij, në të kaluarën, kur pozicionohej, së paku, si kriptokatolik”. Kështu ka thënë gazetari dhe analisti Berat Buzhala, pas deklaratës së Haradinajt që punëtorët e Bashkësisë Islame të paguhen nga buxheti i shtetit.

“I bindur që kjo nuk i ka dhënë efektet e dëshiruara, ka filluar ta marrë një kthesë drejt elektoratit shumicë, atij mysliman. Viktima e parë e kësaj kthese ishte ish-zëdhënësi Ernest Luma, që sigurisht paska qenë në terr informativ për strategjinë e re të partisë”, ka thënë Buzhala për “Zërin”.

Buzhala ka thënë se në vazhdën e ideve të pamenduara mirë, të kohëve të fundit, të z. Haradinaj, është edhe kjo me pagat për Bashkësinë Islame. “Këto gjëra realizohen me ligje, me amendamentime të tyre, e jo me deklarata politike”, ka thënë Buzhala.