Buxhovi: Bashkimi kombëtar është ideologji e shekullit të kaluar, shteti i Kosovës duhet të ruhet me fanatizëm

Historiani Jusf Buxhovi në emisionin Pressing të T7, ka thënë se bashkimi kombëtar në mes të Kosovës dhe Shqipërisë është një ideologji e shekullit të kaluar. Ai gjithashtu tha se shteti i Kosovës duhet të ruhet me fanatizëm.

Buxhovi ka thënë se si historian e di që shqiptarët kanë të drejtë për bashkim kombëtar. Por, politikisht qëndron kundër kësaj ideje.

“Si historian unë e di që shqiptarët kanë të drejtë bashkim kombëtar. Por, si politikan jam kosovocentrist. Po të mendosh për bashkim kombëtar, kjo është ideologji e shekullit të kaluar”, është shprehur Buxhovi.

Buxhovi kujtoi 1912’tën ku shqiptarët fituan shtetin, por nuk u futën të gjitha trojet shqiptare brenda këtij shteti.

“Do të ishte iluzion që historia të kthehej në vitin 1912 ku shqiptarët “fituan” një shtet ku nuk u futën të gjithë shqiptarët”

Tutje, Buxhovi tregoi se si do duhet të sillen Kosova dhe Shqipëria si dy shtet shqiptare brenda Evropës.

“Shteti shqiptar e ka obligim ta konsiderojë shtetin kosovar si arritje e shekullit. Gjithashtu do duhej të shpallej 17 shkurti festë zyrtare. Kosova dhe Shqipëria do duhej të krijonin një bashkësi kombëtare brenda çatisë Evropiane”, shtoi Buxhovi.