Buxheti rrezikohet nga “qeverisja e pakicës”

Projektbuxheti i vitit 2014 do të jetë testi i radhës për koalicion qeverisës. Ky dokument, që sipas zyrtarëve qeveritarë parasheh një tavan buxhetor prej 1 miliard e 590 milionë euro, apo për 31 milionë më shumë se buxheti i vitit 2013, pritet të miratohet në Qeveri në fund të javës së ardhshme dhe i njëjti më pas të procedohet për miratim në Kuvend. Zv/kryeministri Hajredin Kuçi, ka thënë se ata janë brenda afateve ligjore sa i përket procedimit të këtij dokumenti për miratim.

“Afati i fundit për t’u proceduar në Kuvend është 31 tetori. Ne do ta kemi këtë çështje në mbledhjen e Qeverisë javën e ardhshme”, ka bërë të ditur ai. Por kalimi i këtij dokumenti vihet në pikëpyetje pasi institucioni që duhet ta miratojë atë, gjendet në krizë.

Kuvendi që nga fillimi i sesionit vjeshtor nuk po mund të zhvillojë seanca të rregullta, për shkak të bojkotit si nga opozita ashtu edhe nga vetë pozita. Të dy taborët fajësojnë njëri-tjetrin për situatën e krijuar. Partitë në pushtet arsyetohen se janë në fushatë, ndërsa opozita e sheh këtë veprim të mazhorancës më tepër si ikje nga Kuvendi për shkak të humbjes së numrave të mjaftueshëm për të miratuar ligje…(Tribuna).