Buxheti po trafikohet, kontrabanda në kufi mbështetet

Opozita e quan të paligjshëm projektligjin për buxhetin 2016. Qeveria ‘Mustafa-Thaçi’ po e zhvat dhe po e shkatërron shtetin.

Analistë dhe deputetë kosovarë kanë vlerësuar se praktikat e deritashme tregojnë se leximi i parë dhe i dytë duhet të kalojnë në Kuvend nëpërmjet debatit, por në Kosovë nuk pati fare debat

Në seancën e zhvilluar në kushte të jashtëzakonshme të Kuvendit të Kosovës dhe pa prezencën e opozitës, koalicioni PDK-LDK pa asnjë debat, ditë më parë, e ka miratuan në lexim të parë projektbuxhetin për vitin 2016. Analistët e ekonomisë dhe deputetët të opozitës e kanë akuzuar Qeverinë ‘Mustafa’ se e ka trafikuar buxhetin, pa iu nënshtruar asnjë debati cilësor dhe kritik.

Projektbuxheti për vitin 2016 është 1 miliard e 598 milionë euro. Ministri i Financave, Avdullah Hoti, gjatë prezantimit para deputetëve, në sallën e improvizuar, theksoi se me këtë buxhet parashihet të ketë zhvillim ekonomik dhe rritje ekonomike 3.8 për qind, që sipas tij është më e madhja në rajon.

Kreu i Qeverisë, Isa Mustafa, ka deklaruar se me këtë projektbuxhet synohet zhvillim më i madh ekonomik, krijimi i vendeve të reja të punës, luftimi i evazionit fiskal, krimi i organizuar, kontrabanda dhe korrupsioni.

Ai gjatë fjalimit të tij i ka siguruar deputetët se gjatë leximit të dytë të projektbuxhetit për vitin e ardhshëm do të merren parasysh të gjitha propozimet, vërejtjet e grupeve parlamentare dhe të komisioneve parlamentare./kosova sot/