Busull e reumës

Poezi nga Meti Rexhepi

syzat e reve dioptri e bashkave mbi sy
të lajthisin hap-mbylljet e ombrellës
nuk mbuloheshin ece-jake prej pikash
kahja vertikale e rënies harkohej në pjerrtësi
ritmi i lashtë ua plandoste fotosintezën
trotuareve alesë gjetheve me të verdhën
syzave mbështillen të përhiturat zymti
zjarrin e qiellit e gëlltit sfungjeri i avujve
një flutur e bardhë mbi krahët e saj
bartte peshën e së verdhës
krah-shpuar prej të plumbtave pika
viktimë e dorëzuar sorrëshkinave
*
syzat avullore pa korniza pa vegë për veshë
kur të duash nuk mund t`i heqësh as t`i vësh
ritmet e përhitura fshehin rrotullimet e sipër-shfaqjeve
hije të ftohta pikat të ngrira faqeve
ndërmjet zjarresh akujsh prushit e erës
frymuan mësymjet tej shtrirjes së shkujdesur të verës
deri këtu mandatin nuk e kishte reuma
para mësymjes hapat u futën në një dendësi mjegullash
u shurdhua kumti për ndodhjen pezull
përpara shkasit të rrembave të zhveshur
ji kurdo herë nën çati të kokës
derisa nën shtylla të eshtrave rrjedhin damarët e tokës
*
tetësheve të ecjes me bastun i drejtpeshuar
i vure syrin durimit se si nxjerr shkulma të shkumës
sërish i yshtur pas furtunës
kur do t`i prekë jonet e vatrës busull e reumës
*
nën çatinë e realitetit
ndoshta nuk do t`ia nënshkruash disfatën vetit

Gjilan, tetor 2020

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).