Bunjaku: Seanca megjithatë do të mbahet më 30 dhjetor
RajoniPress
14:17, 18 Dhjetor, 2014
Gjilan – Valentina Bunjaku Rexhepi përmes një komunikate ka njoftuar se seanca e Kuvendit Komunale do të mbahet më 30 dhjetor 2014 dhe kjo sipas saj është arritur edhe me grupimet politike në mbledhjen e Komitetit për Politikë dhe Financa.
Ne sot mbajtëm mbledhjen e Komitetit për politikë dhe financa, e në të cilin takim shqyrtuam një varg çështjesh që janë të rëndësishme për mbarëvajtjen e punëve në institucionet e komunës sonë si dhe që kanë ndikim të rëndësishëm për një jetë më të mirë të qytetarëve të Komunës së Gjilanit thuhet në njoftimin e Valentina Bunjakut Rexhepit.
Ne si institucione komunale paraprakisht ishim të njoftuar se Kryetari i Komunës z.Lutfi Haziri ka pasur të udhëtoj jashtë vendi sepse si lider që është ai i prinë shumë proceseve të rëndësishme që e përcjellin shtetin tonë, e në kuadër të kësaj unë shfrytëzoj rastin ta uroj për kontributin që ai jep në vazhdimësi për avancimin e shumë proceseve që shkojnë në interes të vendit tonë.
Duke pasur për bazë të gjitha këto dhe me qëllim që agjenda e punëve në institucione komunale të jetë në harmoni, ne sot mbajtëm mbledhjen e Komitetit për politikë dhe financa e ku bashkërisht me të gjitha grupimet politike vendosëm që seancën e kuvendit ta mbajmë në afat të rregullt ligjor pra më datën: 30 dhjetor 2014. Vendimin në fjalë nuk e kemi marrur për shkak të reagimeve të disa individëve, por e morëm në shenjë respekti për kryetarin Haziri, ngase ai është zëri i gjithë qytetarëve të Gjilanit dhe prezenca e tij në seancë të kuvendit është e rëndësisë së veçan.
Kuvendi Komunal si organi më i lartë i legjislativit lokal ç`do herë ka për bazë harmonizimin e agjendave të institucioneve komunale dhe në kuadër të kësaj lus anëtarët e Kuvendit Komunal të mirëkuptojnë agjendën e kryetarit dhe angazhimet e grupit tonë politik si dhe vullnetin qytetar që mua më mandatoi të udhëheq me institucionin më të lartë të Komunës së Gjilanit thuhet në njoftimin e Valentina Bunjakut Rexhepit kryesuese e Asamblesë Komunale./rajonipress/
