Bunjaku Rexhepi: Shkolla “Don Bosko” model për shkollat tjera

Gjilan – Me program të pasur kulturor-artistik nga nxënësit, është shënuar sot Dita e Shkollës “Don Bosko” në Gjilan dhe njëherit 200-vjetori i lindjes së Don Boskos.Kryesuesja e Kuvendit Komunal të Gjilanit, Valentina Bunjaku Rexhepi, e cila ka marrë pjesë në këtë ngjarje, në emër të kryetarit Lutfi Haziri ka uruar nxënësit, mësimdhënësit dhe drejtuesit e kësaj shkolle me rastin e Ditës së Shkollës, duke thënë se “Don Bosko” është model për shkollat tjera.

“Në emër të kryetarit Haziri dhe të Kuvendit Komunal të Gjilanit ju uroj sot Ditën e Shkollës duke ju dëshiruar shumë suksese. Dua të përgëzoj drejtuesit e kësaj shkolle për cilësinë dhe kushtet që u ofron nxënësve dhe thjeshtë kjo shkollë është model për të gjitha shkollat tjera”, ka thënë Bunjaku Rexhepi.

Ndërsa, drejtori i qendrës “Don Bosko”, Don Dominik Qerimi ka thënë se për të pasur sukses në edukimin e gjeneratave të reja duhet të funksionoj trekëndëshi nxënës-prind-mësimdhënës, për të shtuar se kjo po funksionon deri tani mjaft mirë në këtë shkollë.

Ai tha se kolegji në Gjilan ka deri më tani të regjistruar 52 nxënës me një kuadër profesional të përgatitur mirë dhe me synim zhvillimin dhe zgjerimin e bashkëpunimit, por edhe përgatitjen e kuadrove të reja të cilat janë të gatshme të konkurrojnë kudo edhe jashtë vendit./rajonipress/