Bunjaku-Rexhepi: Raporti i OJQ “Anamorava” i pasaktë, dhe jo profesional

Gjilan – Ky raport është jo i saktë, jo i drejt, jo profesional dhe nuk paraqet gjendjen reale të punës së Kuvendit dhe trupave ndihmës të tij gjatë vitit 2015. Raporti ka shumë gabime teknike e gjuhësore dhe kjo na e bënë shumë të vështirë çka në të vërtetë ka dashur të thotë monitoruesi, tha Bunjaku Rexhepi. Kurse Riad Rashiti nga radhët e PDK-së, e ka mbështetur raportin, duke e vlerësuar si real, ndërkaq ka theksuar se “fatkeqësisht këtu kemi dy konstatime, raporti i “Anamoravës” që është me plot kritika, vërejtje e lëshime për Komunën në përgjithësi, ndërkaq kryesuesja po flet krejt bardh”.

Organizata joqeveritare “Anamorava” në Gjilan, ka paraqitur sot raportin e monitorimit të Komunës për vitin 2015, ku përfaqësuesi i saj, Isa Shefkiu, tha se në shumicën e sektorëve të ekzekutivit dhe legjislativit ka vërejtje, e kritika, të cilat sipas tij, janë të domosdoshme për t’u përmirësuar.

Por, me këtë konstatim nuk është pajtuar kryesuesja e Kuvendit Komunal të Gjilanit, Valentina Bunjaku Rexhepi, e cila vlerësoi se raporti i OJQ “Anamorava” i pasaktë, jo i drejt dhe nuk paraqet gjendjen reale.

“Ky raport është jo i saktë, jo i drejt, jo profesional dhe nuk paraqet gjendjen reale të punës së Kuvendit dhe trupave ndihmës të tij gjatë vitit 2015. Raporti ka shumë gabime teknike e gjuhësore dhe kjo na e bënë shumë të vështirë çka në të vërtetë ka dashur të thotë monitoruesi”, tha Bunjaku Rexhepi.

Ajo tha se në shumicën e pikave të paraqitura, raporti ka kritika të pavend, ndërkaq ka shfaqur shpresën se në raportin e radhës të mos përsëriten ato.

Shefi i grupit të këshilltarëve të LDK-së në Kuvend, Avdyl Aliu, këtë raport e ka vlerësuar si kohë e harxhuar dhe letër e harxhuar, pasi sipas tij, nuk është në përputhje me realitetin.
“Ka mangësi elementare. Është huqur numri i asambleistëve, pastaj numri i anëtarëve të LDK-së dhe shumë e shumë huqje të tjera”, u shpreh Aliu.

Ndërkaq, opozita pati fjalë të mira për raportin. Riad Rashiti nga radhët e PDK-së, e ka mbështetur raportin, duke e vlerësuar si real, ndërkaq ka theksuar se “fatkeqësisht këtu kemi dy konstatime, raporti i “Anamoravës” që është me plot kritika, vërejtje e lëshime për Komunën në përgjithësi, ndërkaq kryesuesja po flet krejt bardh”.

Shefi i këshilltarëve të lëvizjes Vetëvendosjes, Nevzad Isufi, ka deklaruar se pajtohen me shumicën e gjetjeve të raporti, të cilat sipas tij, kanë qenë vërejtje të vazhdueshme edhe të subjektit që ai i takon.

Në debat, vlerësimet e tyre i kanë dhënë edhe anëtarë tjerë të partive politike, sikurse edhe nga shoqëria civile./rajonipress/