Bunjaku : Nga shkolla “Selami Hallaqi” kanë dalë mjek, doktor shkence e magjistra

Gjilan – Nga shkolla fillore “Selami Hallaqi” në Gjilan kanë dalë kuadro të artë, mjek, doktor shkence, magjistra e shumë profile tjera. Kështu ka thënë sot kryesuesja e Kuvendit Komunal të Gjilanit, Valentina Bunjaku Rexhepi, e cila ka folur në emër të kryetarit Lutfi Haziri me rastin e shënimit të “Ditës së Shkollës” së “Selami Hallaqit”.

“Unë jam e lumtur dhe në të njëjtën kohë krenare me të arriturat e kësaj shkolle, prandaj ju uroj shumë suksese të gjithëve. Jam krenare sepse nga shkolla fillore “Selami Hallaqi” në Gjilan kanë dalë kuadro të arta, mjek, doktor shkence, magjistra e shumë profile tjera. Kjo shkollë është shembull i edukimit të gjeneratave, prandaj edhe njëherë po ua përsëris se arsimi është shtylla e parë e qeverisjes Haziri. Brenda një viti e kemi përmirësuar këtë sektor dhe kështu do të vazhdojmë”, ka thënë Bunjaku Rexhepi, para qindra të pranishmëve, në mesin e të cilëve ishte edhe drejtori i Arsimit, Nazmi Musa, drejtorë të drejtorive komunale etj.

Nga ana a tij, drejtori i Drejtorisë Komunale të Arsimit, Nazmi Musa, ka thënë se nga bankat shkollore të komunës sonë dolën shumë intelektual të të gjitha profileve, të cilët i dhanë krah rritës së ekonomisë, shkencës dhe kulturës shqiptare, duke përmendur faktin se DKA ka në prioritet investimet në këtë shkollë.

“Puna e palodhshme e mësimdhënësve dëshmohet me garat e nxënësve dhe sukseset e tyre që po i tregojnë duke zënë vendet e para në nivel të Republikës së Kosovës dhe në garat ndërkombëtare e simpoziume në lëmit e ndryshme: arte muzikore, arte pamore, lëndën e matematikës, gjuhës angleze etj., përmes të cilave i japin emër arsimit gjilanas. DKA, në mundësitë tonë, do të ketë prioritet shkollën tuaj për investime, sado të vogla apo të mëdha qofshin, vetëm e vetëm që ju, nxënës të dashur dhe kolegë të mi të keni suksese të larta në cilësinë e mësimdhënies e mësimnxënies”, është shprehur drejtori i DKA-së, Nazmi Musa.

Programi i “Ditës së Shkollës” së “Selami Hallaqit” është përmbyllur me një program të pasur kulturor-artistik nga ana e nxënësve të saj./rajonipress/