Bunjaki optimist: Mund të fitojmë ndaj Turqisë

Albert Bunjaki beson se Kosova mund të marrë një pikë dhe ndoshta edhe fitore ndaj Turqisë. Trajneri i Kombëtares së Kosovës, Albert Bunjaki, duket optimist para sfidës me Turqinë që zhvillohet të shtunën. Në konferencën për media, Bunjaki tha se djelmoshat e tij mund t’i befasojnë vendasit duke marrë rezultat pozitiv.

“Besoj se mund të befasojnë Turqinë duke marrë një pikë ose edhe të fitojmë. Nëse jo nesër, pa dyshim se në duelet e ardhshme”, u shpreh Bunjaki.

“Kemi një përfaqësuese të re me moshë mesatare 22-23 vjeçe, që kemi filluar të garojmë vetëm që dy muaj, kurse e kemi një grup me rivalë shumë të fortë, prandaj duhet të kemi durim dhe sukseset do të vijnë. Kisha dashur që të kualifikohemi në Botëror, por e kam thënë edhe më herët se kualifikimi në Evropian është objektiv më real”, ka shtuar përzgjedhësi Bunjaki. /Express/