Bunjaki në hall para ndeshjes me Islandën

Pjesa ofensive është brenga më e madhe për Albert Bunjakin, i cili duhet të zgjedh treshen sulmuese mes shumë lojtarëve që ka në dispozicion.

Trajneri i Kosovës, Albert Bunjaki, është në dilemë të madhe para ndeshjes me Islandën, sa i përket formacionit startues të premten mbrëma në “Loro Boriçi”, shkruan Gazeta Express.

Sulmi është arma më e fortë që ka Kosova në këto momente dhe për sfidën ndaj Islandës, disa lojtarë duhet të pranojnë stolin, pavarësisht se ndoshta edhe meritojnë të jenë titullarë.

Është mësuar se Besart Berisha dhe Milot Rashica janë të pa prekshëm për Albert Bunjakin dhe se dilema e vetme është në krahun e majtë të sulmit ku për atë pozitë garojnë tre lojtarë klasi si: Arbër Zeneli, Bernard Berisha e Bersant Celina.

Bunjaki ka edhe 24 orë kohë që të zgjedhë mes këtyre tre lojtarëve, për të kërkuar fitoren e parë në kuadër të eliminatoreve për botërorin “Rusia 2018”. /Express/