Bujanoc: Sulmi ndaj kryetarit të republikanëve, akt anticivilizues!

Kryesia e Partisë Republikane, reagon ashpër kundër sulmit të një grupi huliganësh serbë, ndaj kryetarit të Partisë Republikane, për Bujanoc, Avdil Ramadani.
Në reagimin e Partisë Republikane, bëhet e ditur se në mbrëmjen e të enjtes së 14 prillit, persona të panjohur të nacionalitetit serb, në Bujanoc, duke demoluar bilbordet e republikanëve, kanë sulmuar fizikisht edhe kryetarin Avdil Ramadani, i cili rastësisht qëlloi në momentin e kryerjes së aktit vandal.

Një akt të tillë vandal, Partia Republikane e ka paraqitur në organet kompetente dhe OSBE, duke kërkuar të zbardhet rasti dhe aktorët e kësaj vepre qyqare të nxirren para drejtësisë dhe të marrin dënimin e merituar.

Partia Republikane, bënë të ditur se ky është rasti i dytë brenda 4 muajve, që sulmohet ky subjekt politik. Në natën e 26 dhjetorit të vitit 2015, persona të papërgjegjshëm, thyen dhe demoluan dritaret e zyrës së kësaj partie, dhe aktorët e kësaj vepre akoma nuk janë zbuluar nga organet kompetente, thuhet në reagimin e PR, të nënshkruar nga kryetari i saj z. Avdil Ramadani./rajonipress/