Bujanoc: Republikanët reagojnë kundër sulmit të huliganëve serbë, ndaj familjes Bajrami

Kryesia e Partisë Republikane, sot ka vizituar familjen Bajrami, nga Suharrna e Bujanocit, e cila te premten e 22 prillit, ishte cak i sulmit të një grupi prej 11 huliganësh serbë, të cilët pa asnjë arsye depërtojnë në pronën private të kësaj familje, duke i shkaktuar shqetësime dhe trauma.

Pas një kacafytjeje mes familjes së Selami Bajramit, kryetar i Bashkësisë Lokale të Zarbicës dhe grupit të huliganëve serbë, vijnë policia e cila pas një intervenimi arrijnë të shmangin një tragjedi njerëzore, por në anën tjetër në vend se të ndëshkojnë huliganët e papërgjegjshëm, burgosin djalin e Bajramit, Fitim Bajrami, i cili për momentin gjendet në burgun e Vranjës.

Në bazë të deklaratave të familjarëve Bajrami, nuk është hera e parë, që huliganët serbë nga Vranja e sulmojnë këtë familje dhe ata pak banorë, që jetojnë në brezin kufitar Kosovë – Serbi. Gjithashtu, gjatë këtij takimi, mësohet se shkaktar i këtyre incidenteve merret pylltari nga Kompania “Serbia Shuma”, i cili është një serb nga Kosova, me një disponim antishqiptar, provokon banorët e Suharrnës dhe më gjerë me fjalët më vulgare dhe provokative: “Do t’u kallim gjithë shqiptarëve”, “Do t’u shfarosin të gjithëve” e kështu me radhë.

Republikanët, gjithashtu, mësojnë nga familja Bajrami, se jo më larg se vitin e kaluar, kriminelët serbë ia vranë një bik dhe ia therrën një kali, raste këto, të cilat u lajmëruan në policinë e Bujanocit, Vranjës dhe autoritetet komunale, mirëpo deri sot asnjë rast nuk është zbardhur, ashtu siç nuk është ndriçuar as rasti i sulmit me thikë të djalit të Bajramit, Ilmi Bajrami, nga një grup serbësh nga Vranja.

Partia Republikane, rastin e të premtes dhe të gjitha rastet e tjera, me të cilat është shqetësuar familja Bajrami dhe familjet e tjera të Malësisë së Bujanocit, do t’i alarmojë para institucioneve vendore e ndërkombëtare, duke mos përjashtuar as OSBE-në.
Partia Republikane, këtë sulm barbar të huliganëve serbë, dy ditë para zgjedhjeve lokale të 24 prillit, e konsideron si prishje të heshtjes zgjedhore, e cila është bërë e orkestruar mirë nga qarqe të ndryshme për të mbjell panik tek elektorati shqiptar i Malësisë, për të mos dal me votuar të dielën e 24 prillit.

Partia Republikane, apelon te banorët e Malësisë, të mos bien pre e provokimeve të Beogradit, i cili me padurim pret të nxit incidentet e kaluara, për të zbrazur këtë rajon nga ata pak shqiptarë, të cilët llogariten si roja e viseve etnike.

Partia Republikane, gjithashtu, kërkon nga faktori relevant shqiptar, nga institucionet komunale e shtetërore, nga faktorët ndërkombëtarë, që të bëjnë trysni te Beogradi, që të heq dorë nga dhuna shtetërore, kundër banorëve të Malësisë së Bujanocit, të cilëve me të padrejtë i shlyhen nga evidence e gjendjes civile, u pasivizon vendbanimet, si dhe i sulmohen ne prag të shtëpisë, duke i bastisur, plaçkitur dhe burgosur, vetëm e vetëm se janë shqiptarë, njofton Shërbimi për Informim i Partisë Republikane nga Bujanoci./rajonipress/