Bujanoc: Republikanët në takim me OSBE-në

Në selinë e Degës së Partisë Republikane, në Bujanoc, u zhvillua një takim me Shefin e ri të zyrës së Organizatës Europiane për siguri dhe bashkëpunim (OSBE), në Bujanoc, z.Xhefri Billi.

Drejtuesit e degëve të Partisë Republikane për Bujanoc dhe Preshevë: Avdyl Ramadani dhe Driton Ajeti, e njoftuan përgjegjësin e zyrës së OSBE-së në Bujanoc, për rolin dhe misionin e kësaj partie në zgjidhjen e problemeve të pakicave kombëtare në Serbi, duke llogaritur edhe komunitetin shqiptar.

Gjithashtu, gjatë këtij takimi u diskutua për problemet me të cilat po ballafaqohen qytetarët shqiptarë rreth vazhdimit të dokumenteve të identifikimit, shlyerjes nga regjistrat e votimeve dhe të vendbanimeve, pastaj për krizën ekonomike, moszhvillimin ekonomik, si dhe probleme të tjera në fushën e arsimimit të lartë, nostrifikimin e diplomave dhe qarkullimin e lirë ndërkufitar.

Shefi i ri i zyrës së Organizatës Europiane për siguri dhe bashkëpunim (OSBE), në Bujanoc, Xhefri Billi, u interesua për veprimtarinë e këtij subjekti të ri politik, rreth mbështetjes së qytetarëve dhe angazhimet që do t’i ketë ajo në zhvillimin dhe afirmimin e të drejtave të pakicave kombëtare në Serbi.

Avdyl Ramadani nga Bujanoci dhe Driton Ajeti nga Presheva, shpalosën qëllimet programore të Partisë Republikane, prioritetet e saj dhe angazhimet për një jetë më të mirë të qytetarëve të kësaj komune dhe më gjerë, në këto hapësira, duke u nisur nga stabiliteti politik e ekonomik, avancimi i arsimimit të lartë, zbutja e papunësisë dhe integrimi i pakicave kombëtare në organet komunale dhe qendrore.

Drejtuesit e Partisë republikane për Luginë të Preshevës, falënderuan përfaqësuesin e OSBE-së, për këtë vizitë me karakter pune, duke e çmuar lartë misionin e saj, në rrugën e realizimit të të drejtave të qytetarëve pa dallim etnie, kulturore e fetare, njofton Shërbimi për Informim i Degës së Partisë Republikane për Bujanoc./rajonipress/