Bujanoc: Për renovimin e shkollave “Sveti Sava” dhe “Branko Radiçeviq”, janë siguruar nga BE 280 milion dinarë (rreth 2.3 milion euro)

Në prag të zgjedhjeve lokale dhe parlamentare në Serbi, vjen lajmi për renovimin e plotë të shkollave “Sveti Sava” dhe “Branko Radiçeviq” në qytetin e Bujanocit, janë siguruar nga Bashkimi Evropian rreth 280 milion dinarë (rreth 2.3 milion euro) ndërsa punimet do të fillojnë në verën e këtij viti, bënë të ditur portali Bujanovaçke.

Në këto dy objekte shkollore, në të cilat mësojnë nxënësit e nacionalitetit serbë dhe romë, pushteti qendror i Vuçiqit, me ndihmën e donacionit nga BE, stimulon këto dy bashkësi etnike, për të përfituar mbështetjen e elektoratit në zgjedhjet lokale dhe parlamentare, në mënyrë që pas Medvegjës, partia e tij, të jetë pjesë e qeverisjes lokale.

Sipas Bujanovaçkes, vetëm një ditë para se të shembet një pjesë e pllakës në njërën nga paralelet e Shkollës së Mesme “Sveti Sava”, në Qeverisjen Lokale ka arritur kontrata mbi rekonstruimin e kësaj shkolle me vlerë prej 92.5 milion dinarë si dhe një tjetër shumë e dyfishit të vlerës së të parës, rreth 185 milion, për rekonstruimin e shkollës fillore “Branko Radiçeviç”.

Fondet e parapara për rekonstruimin e objekteve të shkollave nga themeli deri në kulm arrijnë si donacion i Unionit Evropian, gjegjësisht Bankës gjermane KFË, përmes Zyrës Republikane për Menaxhimin e Investimeve Publike, në bazë të projektit të Zyrës për Zhvillim Ekonomik Lokal (ZZhEL) të Komunës së Bujanocit.

Këto informata i ka bërë publike për mediumin serbe, Zëvendës Kryetari i Komunës Stojança Arsiç.

“Kemi marrë propozim kontratën, për të cilat nuk kemi asnjë kundërshtim. Komuna ka siguruar të gjithë dokumentacionin mbështetës të nevojshëm.

Mbetet për projektuesit të japin vlerësimet përfundimtare të çmimeve, pas së cilës pason shpallja e tenderit.

Punimet do të fillojnë në fund të këtij viti shkollor dhe do të zgjasin gjatë verës” ka thënë Arsiç.

Sipas fjalëve të tij, problemeve me ngrohjen, rrjedhjet, instalimet, izolimin, tualeteve të shkatërruar dhe sallave të edukatës fizike me dysheme të rrënuara, i ka ardhur fundi.

“Të gjitha këto do të rregullohen, nga themelet deri në kulm do të kryhet rekonstruimi, me vëmendje të veçantë në efiçiencën energjetike.

Projektet janë aq të gjera dhe aq shumë hynë në detaje saqë janë siguruar edhe ulluqet me ngrohje për të shkrirë akullin dhe borën./bujanovaçke/Jetapress/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).