Bujanoc: Dita e të drejtave të njeriut

10 dhjetori është një ditë e shënuar historike në kalendarin e të drejtave botërore të njeriut.Kjo ditë, që bie në ditën Ndërkombëtare të të drejtave të njeriut, shënohet me një varg manifestimesh të ndryshme, në kujtim të Deklaratës Universale për të Drejtat e Njeriut (1948).

Kjo ditë, kaq e rëndësishme e korpusit të të drejtave individuale dhe kolektive, të shqiptarëve në Serbi, e posaçërisht në Luginë të Preshevës, po shënohet sa për të thënë.

Shqiptarët e jugut të Serbisë, nuk mund të krahasohen as për së afërmi me serbët e veriut të Kosovës, në sferën e të drejtave dhe lirive të njeriut.

Beogradi, për ato të drejta, që kërkon për serbët në Kosovë, ua mohon qytetarëve shqiptarë, ashtu siç i injoron edhe konventat ndërkombëtare, që kanë të bëjnë me të drejtat e pakicave në Serbi.

Po shqiptarëve të Luginës, nuk u shkelen dhe nëpërkëmben të drejtat themelore vetëm nga organet shtetërore, por edhe nga ato lokale, për të cilat u sakrifikuan dhe u flijuan brez pas brezi.

Këto probleme, më së miri i dinë, por që ngurrojnë t’i thonë publikisht, organizatat joqeveritare që merren me mbrojtjen e të drejtave të njeriut.

Dikur e kishim më lehtë të kritikojmë Beogradi dhe pushtetet lokale të udhëhequra nga serbët, për diskriminim nacional e racor, por sot si të protestohet kundër një udhëheqjeje e cila ka ardhur me votën e qytetarëve shqiptarë.

Pushtetet lokale në Preshevë, Bujanoc dhe Medvegjë, po i shkelin të drejtat e qytetarëve shqiptarë në punësim, shkollim, integrim etj.

Nuk ka rajon më specifik, si ky i Luginës së Preshevës, ku të drejtat e njeriut shkelen çdo ditë, duke u nisur nga ato më themeloret: ekzistenca.

Se sa cenohen të drejtat e njeriut shqiptar në Serbi, shikoni raportet vjetore të Këshillave për të Drejta e Njeriut dhe do të tmerroheni se si pas kaq vjetësh të luftës për liri, e drejta e shqiptarit përbuzet, injorohet e nëpërkëmbet, vetëm se është shqiptar!

Një mendimtar shqiptar ka thënë, po parafrazoj: “Bukë e kripë mund të sigurojmë edhe nënë thundrën e armikut, por kemi nevojë për gjellën e shpirtit, e ajo është kultura”.

E njerëzit pa dije e kulturë nuk e dinë sa është “boll”, duke i diskriminuar të tjerët nga pozita e pushtetit, vetëm se nganjëherë nuk mendojnë si ata, nuk i takojnë të njëjtës parti a shoqëri!/rajonipress/
Shoqëria Civile “Perspektiva”, në Bujanoc