Bugajski i thotë ambasadorit gjerman të mos shtyhet njohja reciproke: E pamë me Putinin, Vuçiqi do ta destabilizojë rajonin

Janusz Bugajski, ekspert për Ballkanin nga Qendra për Analiza të Politikës Europiane (CEPA) në Washington, kërkon që Bashkimi Europian dhe Shtetet e Bashkuara të Amerikës të mos e shtyjnë njohjen reciproke mes Kosovës dhe Serbisë.

Ai i tha ambasadorit gjerman në Kosovë, Jorn Rohde se sa më shumë që shtyhet njohja reciproke, presidenti serb Aleksandar Vuçiq “aq më shumë do ta destabilizojë rajonin”, raporton Gazeta Express.

“Ne e pamë se ku çuan thirrjet për “de-përshkallëzim” me Putinin. Sa më gjatë të vonojnë BE-ja dhe SHBA-ja në shtyrjen e njohjes reciproke Serbi-Kosovë, aq më shumë Vuçiq do ta destabilizojë rajonin”, ka shkruar ai.

Këtë koment, Bugajski e bëri pasi ambasadori Rohde shkroi se është “absurde të rrezikosh konfrontim të dhunshëm për targa”.

“Nevojitet urgjentisht vullnet politik për depërshkallëzim dhe kompromise bazuar në marrëveshjet e Brukselit! Absurde të rrezikosh konfrontim të dhunshëm për targa derisa Rusia po zhvillon një luftë brutale kundër Ukrainës me viktima tashmë të panumërta”, ka shkruar ambasadori gjerman në Twitter.

Shpërndaje.
© RAJONIPRESS