Brokoli, hudhra dhe jogurti, mbrojnë prej ftohjeve
Disa ushqime e forcojnë sistemin imun. Hani sa më shumë agrume, perime të gjelbra dhe prodhime të qumështit. Në meny duhet të jenë edhe vaji i ullirit dhe ai i sojës, të kuqtë e vezës, që përmban vitamina E. Ushqimi i shëndetshëm, ku dominojnë ushqimet e freskëta të pasura me vitamina dhe minerale, dhe me këtë rast të ekuilibruara me kalori, janë parakusht për të pasur një sistem imun të fortë. Ushqimet e tilla na mbrojnë prej gripit dhe ftohjes.
Bazë e ushqimit për të pasur sistem të fortë imun janë limoni, portokalli, kivi, frutat e malit, ananasi, specat e gjelbër, perimet me gjethe të gjelbër që janë të pasura me vitaminën C.
Mirëpo, as mishin e prodhimet e qumështit nuk duhet t’i shmangni, sepse përmbajnë vitaminën A, të cilën e hasim në spinaq, brokoli, karota dhe speca. Bishtajoret, pemët e thata, frutat e detit janë të pasura me vitamina nga grupi B i vitaminave.
Si ushqimi më i fortë imun, i pasur me probiotikë dhe prebiotikë, përmendet jogurti dhe prodhimet e fermentuara të qumështit. Ajo që duhet të bëni është që këto ushqime t’i futni në menynë javore, shtoni numrin e shujtave dhe gjatë gjithë dimrit do të mbroheni prej viruseve dhe gripit, transmeton gazeta Kosova Sot Online.
Shembulli i menysë së parë:
Para kafjallit: Jogurt ose qumësht me 30 g drithëra, 2-3 rriska bukë integrale me proshutë, lëng të freskët të shtrydhur nga portokalli.
Kafjalli: Biskota me pemë të thara me lëvozhgë të fortë, mollë.
Dreka: Supë pule me perime, mish pa yndyrë nga skara (100-120 g), spinaq, brokoli, lakër jeshile, sallatë të gjelbër me karotë të copëtuar dhe hudhër.
Darka: Djathë të freskët (45-50 g) me domate të pjekur nga furra, çaj të gjelbër me mjaltë.
Shembulli i menysë së dytë:
Kafjalli: Çaj me bukë të thekur dhe marmelatë nga pjeshkat.
Dreka: Bizele me oriz, karota dhe speca, mandarina.
Darka: Kungulleshka të pjekura në furrë, një vezë të fërguar, dardhë.
Shembulli i menysë së tretë:
Kafjalli: 1 lugë fara të lirit, kumbulla të thata dhe mjaltë bagremi të përzier me jogurt me kulturë probiotiku.
Dreka: Supë franceze nga hudhrat (150 g) me bukë të pjekur, karotë të freskët, panxhar dhe selino (200 g), çaj me portokall dhe kanellë.
Darka: Kaçamak me djathë të freskët të lopës dhe jogurt (150 g), çaj me mjaltë.
(Kosova Sot)