Britaniku thyen rekord, interpreton në vendin më të ftoftë në botë

Charlie Simpson ka hyrë në histori duke performuar për 15 minuta në vendin më të ftoftë në botë

Ngrirja në skenë është një ankth për çdo interpretues, por ajo pothuajse u bë realitet për këngëtarin nga Britania e Madhe, Charlie Simpson, i cili ka performuar në vendin më të ftoftë në botë, në Oymyakon të Siberisë.

Këngëtari dhe tekstshkruesi nga Britania e Madhe ka performuar në temperatura ekstrem të ftofta -30˚C për të hyrë edhe zyrtarisht në librin e rekordeve botërore “Guinness”.

Charlie dhe ekipi i tij udhëtoi për katër ditë nëpër rrugët më të rrezikshme për të arritur në fshatin e largët siberian të njohur si “poli i ftohtë”, një nga vendet më të akullta të planetit.

Simpson nuk e ka shijuar këtë herë komoditetin e turneve nëpër koncerte të rokut rreth botës. Për të nuk kishte hotele, por ai ka banuar në shtëpitë e banorëve lokalë, për të cilët kishte performuar me një solo kitarë këngët nga albumi i tij “Young Pilgrim”.

Temperaturat në Oymyakon janë ekstrem të akullta që disa nga vizitorët nuk ishin në gjendje t’i mbajnë më shumë se pesë minuta duart jashtë në të ftoftë.

Megjithatë, për të arritur rekordin botëror, Charlie kishte vendosur të performojë për 15 minuta, duke pauzuar deri 30 minuta në mes të këngëve. Simpson ka thënë se i janë mërdhirë gishtat, por ishte i vendosur për të thyer rekordin botëror.

Charlie tha se ky ka qenë një udhëtim i jetës.

“Një koncert më ndryshe nga ajo që unë mendova se nuk do ta përjetoj kurrë në karrierën time. Qyteti nuk ka TV apo radio, kështu që ata kanë pasur pak ose aspak kontakte me muzikën rok”, tha Simpson.(albinfo)